Open login
Главная Новости Дилларға арам беғишлиған Дилназ
Дилларға арам беғишлиған Дилназ
26.11.2021 14:13   

Дилларға арам беғишлиған Дилназ

«Уйғур авази» гезити, 25.11.21

Мәшүр САСИҚОВ,

«Уйғур авази»

Йеқинда Қуддус Ғоҗамияров намидики дөләт академиялик Уйғур музыкилиқ-комедия театрида Қазақстанниң хизмәт көрсәткән әрбаби, эстрада юлтузи Дилназ Әхмәдиеваниң  https://parvaz.kz/index.php/dilnaz-ahmadieva йәккә концерти өтти.

Мәлумки, Дилназ Әхмәдиева даңлиқ сәнъәткарлар сулалисиниң бир вәкили. Шу түпәйли болса керәк, у бу қетим сәһнигә тамашибинларни бирдинла өзигә мәһлия қилидиған, миллийлигимизни ипадиләйдиған алаһидиликлиримизгә мас келидиған һалда чиқти. Икки күн уда берилгән концертниң дәсләпки күни залда жиңнә санчиғидәк җай болмиди десәк, һәргизму мубалиғә әмәс. Һә, иккинчи күниму зал тамашибинларға лиқ толди.

 

 

 

Концертниң биринчи бөлүмидә уйғурчә, иккинчи бөлүмидә болса, қазақ-рус тиллиридики нахшилар иҗра қилинди. Уларниң һәммисини дегидәк тамашибинлар гүлдүрлигән чаваклири билән қобул қилди. Һәтта, айримлири уссулға чүшүпму үлгәрди. Әнди сәнъәткар залдикиләр билән чақчақ қилишқан һалда алақә бағлап, һәрбир нахшиниң тарихидин учур берип туруши, уларға техиму жуқури кәйпият беғишлиди. Сәнъәткарниң концерт давамида залда өзгә милләт вәкиллириниң болушиға қаримай, асасән уйғурчә сөзлиши, ана тилини убдан билидиғанлиғини көрсәтти вә көпчиликни қайил қилди. Шундақла у репертуаридики нахшилар мәтинлириниң муәллипи мәрһум шаир Абдумеҗит Дөләтов екәнлигини тәкитләп, музыкисини язған тонулған композитор, «Дәрвишләр» топиниң рәһбири Дилмурат Баһаровқа алаһидә миннәтдарлиғини изһар қилди.

Концертниң алаһидилиги шуки, у җанлиқ авазда өтти. Әлвәттә, бу қандақла болмисун, тамашибинниң көңлидин чиқидиған әһвал. Шуңлашқа болса керәк, миллий һәм эстрадилиқ саз әсваплириниң җор болушида орунланған һәрбир нахша көпчиликкә алаһидә арамбәхш дәмлирини беғишлиди. Болупму Дилназниң ата-ана тоғрилиқ нахшисиға чоң экранда аилисигә мунасивәтлик слайд-шоуниң берилиши тамашибинларда чоңқур тәсират қалдурди. Ейтмақчи, бу концертта у сөзи шаир Абдулҗан Азнибақиевқа, музыкиси Кәрим Ғазиевқа тәәллуқ «Әзиз дадам» намлиқ нахшисини дәсләпки қетим иҗра қилип, уни дадиси – даңлиқ сәнъәткар, театрниң бәдиий рәһбири Мурат Әхмәдиевқа беғишлапту. Шу әснадин қариғанда, пәрзәндиниң еқидисигә рази болған ата сәнъәткарға гүлдәстә тутқач, рәхмитини ейтти.

Сәнъәтсөйәр тамашибинларниң көңлидин чиққан йәнә бир көрүнүш Дилназ билән «Ringo» топиниң солисти Адилҗан Өмәровниң сәһнигә биллә чиқиши болди. Улар бир-биригә җор болған һалда, хәлиқ нахшиси «Балиханни» ейтип бәрди. Шундақла концертниң утуқлуқ өтүшигә «Рухсарә» уссул ансамбльниң әзалириму өзлириниң һәссисини қошти. Улар әвришим уссуллири билән һәрбир нахшиға алаһидә роһ берип турди.

Умумән, дилларға арам беғишлиған концерт әйнә шундақ жуқури дәриҗидә өтти. Униңдин бәһирләнгән тамашибинниң өйлиригә чоңқур тәсират илкидә қайтқанлиғи ениқ.

https://uyguravazi.kazgazeta.kz/news/46719

 
Интересный материал? Поделись с другими: