| Ирадилик Ирадә | |
|
Ирадилик Ирадә«Уйғур авази» гезити 14.10.21
Бирнәччә жиллардин буян, болупму иҗтимаий торларда А.Розибақиев намидики 153-мəктəп-гимназияниң оқуғучиси Ирадә Мамутованиң сәнъәт саһасида йәткән утуқлири һәққидә хәвәрләр пәқәт униң уруқ-туққанлири, өзи билим еливатқан билим дәргаһиниң муәллимлири вә жутдашлиринила хошал қилип қалмай, бәлки пүткүл уйғур җамаәтчилигиниң алқишиға сазавәр болуватқанлиғидин хәвәрдармиз. Әнди мошу жилниң 6-октябрь күни Алмута шәһири һакиминиң орунбасари Ержан Бабақумаровниң қолидин «Елбасы Медалі» лайиһәсиниң бронза медали он бәш алмутилиқ оқуғучиға тапшурулған еди. Әйнә шуларниң ичидә әң кичиги А.Розибақиев намидики 153-мəктəп-гимназияниң 9-синип вә Алмута шәһири «Сәнъәт мәктивиниң» оқуғучиси Ирадә Мамутованиң https://parvaz.kz/index.php/irada-mamutova болуши жуқурида ейтилған сөзлиримизниң йәнә бир ярқин ипадиси болуп турупту.
«Елбасы медалі» лайиһәси 2019-жили «El Úmiti» тәшәббуси даирисидә Қазақстанниң Тунҗа Президенти – Милләт лидери корпоративлиқ фонди вә «Милләт Лидери Академияси» тәрипидин тәсис қилинған болуп, униңға 14 – 29 яш арилиғидики яшлар қатнишалайду һәм 14 яштин «бронза», 15 яштин «күмүч» вә 16 яштин «алтун» дәриҗилик медальларға үмүт қилалайду. Лайиһә асасән йәттә, йәни спорт, қабилийәт вә маһарәтниң риваҗлиниши, китап оқуш, пидаийлиқ, миллий мирас, туристлиқ вә иш тәҗрибиси саһалиридин тәркип тапқан. Мәзкүр лайиһә қабилийәтлик балиларни һәр җәһәттин қоллап-қувәтләшкә қаритилған болуп, униңға қатнишиш тәртиви Һөкүмәт қарари билән бәкитилип, Тунҗа Президент фонди тәрипидин өткүзүлүп кәлмәктә. Жил бойи униңға он миңға йеқин адәм қатнишиду. Мусабиқә башлиниш алдида улар бронза, күмүч яки алтун дәриҗиләрни таллавелип, алтә айдин он сәккиз айғичә болған вақит ичидә өзи таллавалған саһа бойичә паалийәт жүргүзиду. Әнди мақалимизниң асасий қәһриманиға келидиған болсақ, Ирадә кичигидинла сәнъәткә қизиқип, өзиниң таланти, интилиши вә тиришчанлиғи билән пән муәллимлириниң, сәнъәт мутәхәссислириниң вә ишқивазлириниң диққәт мәркизидә болуп кәлгәнлигини яхши билимиз. Көплигән сәнъәт көрүклириниң, фестивальлириниң ғалиби аталған Ирадә қизимизниң санақсиз мукапатлири ичидә 2018-жили Дөләтара эксперт кеңиши Президиуминиң «Қазақстан Җумһурийитиниң милләт ғурури» номинацияси бойичә 1-дәриҗилик дипломи вә «Қабилийәтлик гөдәк» медалиға муйәссәр болғанлиғини атап өтсәк купайә. Буниңдин ташқири, Ирадиниң қазақ тили вә дикторлуқ бойичә өткән мусабиқиләрдиму өзини синап, мукапатларға еришкәнлиги яхши мәлум. 2019-жили болса, униң исми Россияниң Москва шәһиридә нәшир қилинидиған «Әң яхши адәмләр» дәп аталған «Чоң хәлиқара қамусиниң» «Балилар – бизниң келәчигимиз» бөлүмидин һөрмәтлик орунға еришти. Сөзимизниң ахирида Ирадиниң ирадилик балилардин болуп йетилип, елимиз Қазақстанниң әң яш талантлири сепидин орун елишиға асаслиқ төһпә қошқан униң ата-аниси, миллий сәнъитимиз вә маарипимизниң җанкөйәрлири Қәлбинур Розиева вә Рәзам Мамутовни, пән муәллимлири Аида Нестерова вә Надийəм Рембақиевани, мәктәп коллективлирини чин жүрәктин тәбрикләп, Ирадә қизимизниң йәниму егиз чоққилардин көрүнүшини тиләймиз. Рәхмәтҗан ЙҮСҮПОВ. Алмута шәһири. |
