| «Бахарда» бизниңкиләрму бар | |
|
«Бахарда» бизниңкиләрму бар«Уйғур авази» гезити, 19 март 2019 жил Мәшүр САСИҚОВ, «Уйғур авази»
Йеқинда Москва шәһиридә өткән «Folk of dance» телевизиялик лайиһидә Баш мукапат — Гран прини утувалған қазақстанлиқ «Бахар» кавказ уссул ансамблида уйғурларниңму бар екәнлигини Интернет торида көрүп, қазилардин бири «уйғур миллити» дегәнни аңлиғанда, көпчилигимизниң мәғрурланғинимиз раст. Биз бу йеңилиқтин хуш болуп, мошу ансамбльға мунасивити бар Айидәм Баратовани издәп таптуқ. У яқниң Билора вә Линара исимлиқ қизлири ансамбль әзалири екән. Тунҗиси он бир йешидин башлап мошу ансамбльда шуғуллинип кәлмәктә. Һазир ансамбльниң бәдиий рәһбири вә хореографи Рита Асланованиң ярдәмчиси болса, кәнҗиси Линара биз сөз қиливатқан лайиһигә қатнашқанларниң бири.
Тәркивидә һәрхил милләт вәкиллири бар коллективниң паалийәт елип бериватқиниға он жилдин ашти. Улар қатнашқан конкурс-көрүкләрдә дайим алдинқи орунлардин көрүнүп, җошқун кавказ уссули билән тамашибинларға хуш кәйпият беғишлап кәлмәктә. Әнди уларниң мәмликитимиздила әмәс, бәлки жирақ-йеқин чәт әлләргиму тәклип қилиниши ансамбльниң аброй-инавитиниң техиму өсүватқанлиғиниң ярқин испатидур.
Йеқинда 8-март – Ханим-қизлар мәйрими күни шу лайиһигә иштрак қилған, йәни МДҺ әллиридин кәлгән 100дин ошуқ сәнъәт коллективи арисида ғалип чиққан «Бахар» ансамблиниң һөрмитигә җәнубий пайтәхттики «Пугасов» ресторанида мәйрәмлик мәрасими болуп өтти. Униңда әзәрбәйҗан мәдәнийәт мәркизиниң рәиси Абилфас Хамедов билән Қазақстан хәлқи Ассамблеяси Алмута шәһәрлик кативатиниң рәһбири Назар Балғимбаев сөзгә чиқип, елимизниң шәнини қоғдап, униң байриғини егиз көтәргәнлиги үчүн коллектив әзалириға миннәтдарлиқ билдүрди. Натиқлар өз сөзидә 25 әлдин кәлгән қатнашқучиларни дағда қоюп, арилаш номинация бойичә, Қазақстанниң талантлиқлар зимини вә көпмилләтлик инақ мәмликәт екәнлигини испатлиған «бахарлиқларни» йәнә бир қетим тәбриклигәч, хатирә соғиларни тапшурди. Шундақла бу күни саһипханлар пәқәт ансамбль коллективиғила әмәс, бәлки уларниң ата-анилириғиму мәйрәмлик дәстихан йейип, һөрмәт билдүрди. Мәрасим ахирида Москва шәһиридә қабилийитини намайиш қилип, башқилар қатарида елимизни өзгиләргә тонутуватқан уйғур қиз-жигитлириниң исим-фамилиясини атимаслиққа көңлүмиз унимиди улар: Билора вә Линара Мухтадова, Амир Ғәниев, Илһам Азнибақиев, Тамирҗан Иләков, Ислам Тохтиев, Рияз Мирзоев вә Тамилә Мирзоева. |
