«Уйғур авази» гезити, 10 ноябрь 2016 ж.

Өткән һәптиниң пәй­шәнбә күни Уй­ғур театриниң 83-мәв­сүми, көплигән тамаши­бинларниң тәли­вигә бола, «Идиқут» тарихий әсәри билән ечилди. Өтмүшимизни әсли­тидиған бу тарихий әсәрниң көпчиликниң көңлидин чиқти, дәп ойлаймиз. Биз һәмсөһбәттә болған тамашибинларниң бири, шаир Абдуғопур Қутлуқ мәзкүр әсәрни йезишта униң муәллипи, хәлиқара «Алаш» мукапитиниң са­һиби, Қазақстанниң хизмәт көрсәткән әрбаби Әхмәтҗан Һашириниң көп әмгәк қилғанлиғини алаһидә тилға алди. Шуниң билән биллә тамашибин сүпитидә уни сәһниләштүргән ре­жиссер, Қазақстанниң хиз­мәт көрсәткән әрбаби Ялқунҗан Шәмиевниң, шундақла көплигән сәнъәт­карларниң өзлиригә жүк­ләнгән вәзипиниң һөд­дисидин утуқлуқ чиқ­қанлиғиниму атап өтти.

Театрдики һечбир спектакль яки концертлардин қалмайдиған Өмүрнисахан исимлиқ анимизниңму театр рәһбәрлиги билән артистлириға мин­нәт­дарлиғи чәксиз. «Театр рәһбәрлигиниң тарихий мавзуға мураҗиәт қилғини тоғра бопту. Бу әсәр келәчәк әвладимиз үчүн пүтмәс-түгимәс байлиқ», дәп дәсләп у өзиниң хошаллиғи билән бөлүшти. Шундақла анимиз тамашибинлар тәрипидин йол қоюлған бәзибир камчилиқларниму байқап олтирипту. Униң ейтишичә, спектакльниң биринчи бөлүми түгәп, тәнәпус елан қилинғандин кейин, бәзи тамашибинлар орунлириға қайтип кирмигән. «Бу бизниң бай мәдәнийитимизгә болған һөрмәтсизлик» дәп өз рәнҗишини билдүрди Өмүрнисахан ана.

Әйнә шундақ тамашибинлар тәрипидин йол қоюлған бәзибир камчилиқларни ейтмиған­ниң өзидә спектакль утуқлуқ өтти. Чүнки бу көпчиликниң көңлидики әсәр. Шу күни мәзкүр тарихий әсәрни ахириғичә зерикмәй олтирип көргән тамашибинларниң пикри шундақ болди.

Ейтмақчи, йеңи мәв­сүмниң ечилиш һарписида Уйғур театриға йеңи бәдиий рәһбәр кәлди. У – «Астана опера» театри мудириниң орунбасари, Қазақстанниң хәлиқ артисти Мурат Әхмәдиев. Йеңи бәдиий рәһбәрниң ишиға утуқ тиләймиз.

Бәхтишат СОПИЕВ.

http://uyguravazi.kazgazeta.kz/?p=26997#more-26997