«Уйғур авази» гезити, 3 ноябрь 2016 ж.

Бүгүнки күндә Яркәнт тәвәсидә көрнәклик сәнъә­ткар, устаз, җәмийәтлик ишларниң активисти Әквәр­җан Исмайилҗановни тону­майдиған уйғур йоқ.  У уйғур тойлирини миллий урпи-адәтлиримизгә риайә қилған һалда, уларға миллий түс берип өткүзүватқан  риясәтчиләрниң бири. Шундақла өзигә охшаш көпчиликниң хизмитидә болуватқан сорунбеги вә ишқиваз сәнъәткарларниң устази. Бүгүн биз, әйнә шу инсанниң изини бесип келиватқан униң оғли, йәни келәчигидин зор үмүт күткүзидиған миллий әсвапларниң қулиғида ойнайдиған ярқин талант Икрәмҗан Лохманов һәққидә ейтип өтмәкчимиз.

Икрәмҗан 1998-жили Панфилов наһийәсиниң Пәнҗим йезисида дунияға кәлгән. «Қуш угисида немә көрсә, шуни қилиду» демәкчи, атисиниң таллиған кәспигә һәвәс бағлиған сәби, әндила төрт яшқа киргинигә қаримай, синтезаторниң җор болушида нахшиларни ейтишқа башлайду. Бәш йешида мәктәп босуғисини атлиған Икрәмҗан мәктәптики оқуши билән бирликтә сәнъәт билиминиму егиләйду. Бир жил Реһимҗан Имәрниң музыка мәктивидә фортепиано үгиниду. Буниңдин ташқири у мәктәптики уйғур тили вә әдәбияти пәни бойичә өткүзүлгән һәрхил олимпиадиларға қатнишип, дайим алдинқи орунлардин көрүниду.

Икрәмҗан Әкрвәрҗан оғли 2013-жили мәктәпни әла баһаларға тамамлап, Алмутидики П.И. Чайковский намидики музыка колледжиға оқушқа чүшиду. Бүгүнки күндә мәзкүр колледжда ғеҗәк синипи бойичә билим еливатқан у 2015-жили өткүзүлгән сәнъәт көрүгидә 2-орунни егиләйду. У мәзкүр дәргаһниң оқутқучиси Сабирҗан Манашев рәһбәрлигидики оркестрда ғеҗәк челип, һәрхил чоң-кичик мәйрәмлик концертларниң турақлиқ иштракчиси. Өткәндә Дилмурат Кузиев аилиси тәрипидин әлачиларға берилидиған ахчилиқ мукапатқа (100 000 тәңгә грант) сазавәр болғанлар арисида Икрәмҗанму бар.

Бийил колледжниң 4-курсида оқуватқан Икрәмҗанниң арзу-арманлири көп. Мәсилән, өз кәспи бойичә алий билим дәргаһлирида оқуп, билимини техиму мукәммәлләштүрүп, уйғур сәнъитигә өзиниң биркишилик үлүшини қошуш екән. Пәқәт ғеҗәкнила әмәс, бәлки равап, дутар, сатар, хуштар, гитара қатарлиқ әсвапларни раван чалидиған у йеқинда Instagram иҗтимаий торда гитарида нахша иҗра қилип, пайдиланғучиларниң жуқури баһасиға еришти.

Бизму, өз новитидә, яш талант егисигә иҗадий утуқ тиләп, арзу-арманлириниң иҗавәт болушини тиләкдашмиз.

Молутҗан  ТОХТАХУНОВ.

Панфилов наһийәси.

http://uyguravazi.kazgazeta.kz/?p=26821#more-26821