«Уйғур авази» гезити, 3 ноябрь 2016 ж.

Өткән һәптидә Алмутидики «Император» ресторанида алийҗанап ишлири билән җамаәтчилик арисида һөрмәткә бөлинип келиватқан  инсан Мәһәммәтҗан  Җанбақиевниң  арман-истәкләрдә, хәлқигә болған чәксиз муһәббитидә суғирилған «Қәлбим тәшвиши» намлиқ шеирлар топлимини тонуштуруш мәрасими болуп өтти.Шеирийәткә муһәббәт бағлиған қәләм саһибини қоллап-қувәтләп  кәлгән тонулған шаирлар Илахун Һошуров, Илахун Җәлилов, Мәмтимин Обулқасимов, «Мир» нәшриятиниң мудири Әлишер Хелилов, «Уйғур авази» гезитиниң баш муһәррири Ершат Әсмәтов вә униң орунбасари Иврайим Баратов, алим Рабик Исмайилов, Әмгәкчиқазақ наһийәсиниң Пәхрий граждини, шаир Шаяхмет Қусайинов, «Интизар» журналиниң иҗраий мудири Пәйзуллам Әхмәтов, шаир мухлислири Азтекин Ибрагимов билән Хәйринисәм Мәсимова Мәһәммәтҗан акини бу утуғи билән қизғин тәбрикләп, муәллипниң әсәригә иҗабий инкаслирини билдүрди.

Тонуштуруш мәрасимида сөз алған сәясәтшунас Қәһриман Ғоҗамбәрдиев Мәһәммәтҗан Җанбақиевниң иҗадий паалийити һәққидә иллиқ сөзлирини ейтқач, мундақ деди: Мәһәммәтҗанниң бүгүн тонуштурулуватқан «Қәлб тәшвиши» шеирлар топлимидин орун алған шеирлар билән рубаийларниң бесим көпчилиги өз вақтида әйнә шу сөйүмлүк гезитимиз сәһипилиридә елан қилинип, оқурмән  қәлбидин орун тапқанлиғи һәммимизгә яхши мәлум. Гәпара ейтип кетидиған нәрсә, буниңдин бираз вақит илгири әҗайип бир мақалә гезитта елан қилинғанда, «Мундақ мақалини «Уйғур авази» пәқәт муштири топлаш мәвсүми һарписидила бериду», дәп  хата пикирдә боптимән. Өзәңлар байқаватқан болсаңлар керәк,  кейинки икки-үч жилниң ичидә «Уйғур авази» гезити чирай вә мәзмун-маһийәт җәһәттин бир балдақ өсти. Һәқиқий мәнасида хәлиқниң гезитиға айланди.

Мәрасим җәриянида талантлиқ сәнъәткар Дилшат Аманбаевниң рәһбәрлигидики хәлиқ талантлириниң орунлишида дилға арам беғишлайдиған уйғур хәлиқ нахшилири  яңрап, көпчиликниң қәлб тарлирини чиртип өтти. Ахирида  сөз алған Мәһәммәтҗан ака Җанбақиев өз қәлимигә мәнсүп:

«Һәр шеирим вижданға байрақ маңа,

Йеқип қалса, байрақму болсун саңа.

Шаир болуш маңа бир кәсип әмәс,

Жүрәктики илһамниң оти аңа, — дегән мисралар билән сөзини йәкүнлиди вә китавини нәшир қилишта йеқиндин яр-йөләк болған шәхсләргә миннәтдарлиғини билдүрүп, натиқларниң иллиқ тиләклири үчүн тәшәккүр изһар қилди.

Шәмшидин АЮПОВ.

http://uyguravazi.kazgazeta.kz/?p=26875#more-26875