| Иҗадий конкурс йәкүни чиқирилди. | |
|
|
«Уйғур авази» гезити, 27 октябрь 2016 ж. Миләтләрара разимәнлик мавзусиға беғишланған әң яхши гезит материаллири, теле-радио программилири Қазақстан хәлқи Ассамблеясиниң мукапатлириға еришти.ҚХАниң «Шаңырақ» журналистика саһасидики иҗадий конкурсиниң ғалиплирини «Шабыт» Қазақ миллий сәнъәт университетида тәбриклиди. Тәнтәнилик мәрасимға Қазақстан хәлқи Ассамблеяси Рәисиниң орунбасари – Президент Мәмурийити ҚХА Кативатиниң башлиғи Ералы Тоғжанов, Парламент депутатлири, медиақурулумларниң рәһбәрлири, регионлуқ һәм миллий аммивий әхбарат васитилириниң муһәррирлири қатнашти. Бийил Қазақстан Мустәқиллигиниң 25 жиллиғи, шундақла Қазақстан Җумһурийитиниң Президенти – Милләт Лидери Нурсултан Назарбаевниң течлиқ, бирлик һәм разимәнлик принциплирида көпмилләтлик җәмийәтни қурушниң қазақстанлиқ үлгисини вуҗутқа кәлтүрүш вә тәрәққий әткүзүштики роли конкурсниң баш мавзуси болди. Униңдин ташқири конкурс ҚХАниң «Чоң мәмликәт – чоң аилә» умуммиллий лайиһиси даирисидиму өткүзүлди. – Өткән жили Президент Қазақстан үчүн муһим мәйрәмлик сәнәни – Миннәтдарлиқ күнини тәстиқлиди, – дәп әслитип өтти Ералы Тоғжанов мәрасимда сөзгә чиқип. – Бу күн җәмийәттә өзара һөрмәткә, миннәтдарлиққа, бирликкә асасланған мунасивәтләрни шәкилләндүрүшкә ярдәм қилиду. Биз, қазақстанлиқлар, өзара мунасивәтләрниң мундақ системисини вуҗутқа кәлтүрүш арқилиқ йеңи ғалибийәтләргә қарап илгириләймиз. У шундақла журналистларниң мәмликәттә течлиқ вә разимәнлик кәйпиятини вуҗутқа кәлтүрүштики хизмитиниму атап өтти.
– Бүгүн шуни ишәшлик ейталаймәнки, кәспийләрдин тәркип тапқан, течлиқ вә разимәнлик мавзусини йорутушниң нәқәдәр муһим екәнлигини чүшинидиған күчлүк журналистлар әвлади шәкилләнди, – деди ҚХА Рәисиниң орунбасари. У милләт бирлиги тоғрилиқ мәсилиниң мустәқилликниң дәсләпки күнлиридин тартипла җумһурийитимиздики дөләт сәяситиниң өзиги болуп һесаплинидиғанлиғини тәкитлиди. Президент Нурсултан Назарбаевниң Қазақстан хәлқи Ассамблеясиниң Рәиси болуп һесаплинидиғанлиғи әйнә шуниң испатидур. Мукапатлаш мәрасимида шундақла Қазақстан Җумһурийити Парламенти Мәҗлиси рәисиниң орунбасари Владимир Божко сөзгә чиқип, конкурс қатнашқучилирини тәбриклиди вә уларға кәспий утуқ-муваппәқийәт тилиди. Бийил «Шаңырақ» конкурсиға мәмликәтниң түрлүк регионлиридин 200дин ошуқ буйрутма келип чүшти. Җумһурийәтлик басқучқа 36 гезит материали, 10 радиопрограмма вә 19 телекөрситиш болуп, 75 материал таллавелинди. «Җәмийәтлик разимәнлик вә умуммиллий бирликни күчәйтишкә қаритилған гезит вә электронлуқ нәширләрдики әң яхши мақалә» номинациясидики мукапатқа «Костанай Агро» вилайәтлик гезитиниң мухбири Сергей Исмаилов сазавәр болди. Әң яхши телематериал үчүн мукапат «Қазақстан» җумһурийәтлик телерадио корпорацияси Алмута редакциясиниң журналисти Аидәм Пәхирдиноваға тапшурулди. |
