«Уйғур авази» гезити, 11 август 2016 ж.

Йеқинда Қирғиз Җумһу­рийитиниң Бишкек шәһиридә «Бейбітшілік әлемі» хәлиқара  қазақ иҗадий бирләшмисиниң уюштуруши билән Россия, Қирғизстан, Татарстан, Қазақстан вә башқиму хошна әлләрниң сәнъәткарлири арисида Қазақстан Җумһурийити Мустәқиллигиниң 25 жиллиғи вә Йүсүп Баласағуний тәвәллудиниң 1000 жиллиғиға мунасивәтлик иҗадий конкурс болуп өтти.Униңға Әмгәкчиқазақ наһийәсидин «Баһар» нахша-саз вә уссул ансамбли қатнишип, хәлқимизниң миллий сәнъитини  намайиш қилди.

Ават йезиси Мәдәнийәт өйи йенида қурулғиниға бәш жил болған «Баһар» ансамбли наһийәлик, вилайәтлик көрүкләрдин ташқири, җумһу­рийәт миқиясидики вә хәлиқара конкурсларғиму қатнишип, жу­қури пәллиләрдин көрүнүп келиватиду. Мисалға, бийил ансамбль Қазақстан Җумһурийитиниң Билим вә илим министрлиги тәрипидин уюштурулған Х Хәлиқара «Ақ көгершін» балилар иҗадийити фестивалида лауреат һәм дипломант  атилип, фестиваль Кубогиға егә болди.

Бишкекқа Ават йезиси Мәдәнийәт өйиниң мудири Долқунҗан Розахунов, ансамбльниң бәдиий рәһбири, йәни мошу қурларниң муәллипи һәм ансамбльниң хореографи Гүлмира Мәсимова, 12 сазәндә оғул вә 10 уссулчи қиз болуп, жут чоңлириниң дуасини елип йолға чиқтуқ. Тәкитләш лазимки, балиларниң ата-анилири бу қетимму бизни һәртәрәплимә қоллап-қувәтлиди. Йәни пәрзәнт­лиримизниң барлиқ йол кирасини өз зиммисигә алди. Имканийити яр бәрмигәнләргә ярдәм қолини сунди. Йәттә ата-ана бизгә һәмра болуп, Қирғизстанға барди. Ишиктилик тиҗарәтчи Тимур Қалиев қолйетимлик баһада транспорт билән тәминләп, йеқин чәт әлгә һечбир қийинчилиқларсиз берип келишимизгә мүмкинчилик яратти. Пурсәттин пайдилинип, шуларниң барлиғиға миннәтдарлиғимизни билдү­римиз.

Мана мошундақ қоллап-қувәтләшкә егә болған биз үстүн кәйпият  илкидә көрүккә қатнаштуқ. Сәһнигә хелила үгинип қалған балилиримиз һеч һодуқмай, уйғур хәлиқ дурданилиридин «Баһар сәйлиси», «Нағра» сазлирини, уйғур, таҗик вә рус хәлиқлириниң уссуллирини чоң маһарәт билән иҗра қилди. Атап кетиш керәкки, һүнәрлирини бар вуҗуди билән намайиш қилишқа тиришқан балиларни җамаәтчилик қизғин алқишлар билән қарши алди. Қазиларму яш сәнъәткарлиримизниң әмгигини мунасип баһалиди. «Баһар» ансамбли Гран-При мукапитиға  сазавәр болди.

Абдусемәт ВАСИЛОВ,

музыка пәниниң муәллими.

Әмгәкчиқазақ наһийәси.

Мәсимҗан ИДИЛОВ чү­шәргән сүрәт.

http://uyguravazi.kazgazeta.kz/?p=25516#more-25516