«Уйғур авази» гезити, 11 август 2016 ж.

«Сәһәрдин Йүсүповниң шагиртлири Үрүмчидин олҗилиқ кәпту» дегән хәвәрни аңлап, йеқинда униң билән учришип, бу һәққидә соридим. – Бийил Үрүмчидики «Талантлар сәһниси» мусабиқисиниң уюштурғучилири мени МДҺ әллиридики талантлиқ балиларни шу мусабиқиға таллавелиш бойичә рәсмий вәкил қилип тайинлиған еди, – дәп сөзини башлиди у соалимға җававән. – Алмутидин өзәмниң шагиртлиримдин башқа бирқатар талантлиқ балиларни апардим вә уларниң сәккизи иккинчи турға сүрүнмәй өтти.

Сәһәрдин Қәмбәр оғлиниң ейтишиға қариғанда, «Азия плюс» студиясидә ишләватқанлар тәркивиму өзгирипту. Талантлиқ композитор Ризайдин Сейитовниң орниға униң шагирти — Чайковский намидики колледжни тамамлиған яш бәстикар һәм нахшичи Расул Мәрүпов аранжировка-пәдәзлигүчи болуп кәпту. У һәм миллий әсвапта үгиниш бойичиму балиларға дәрис бәрмәктә.

С.Йүсүповниң қизи Ипархан Қәмбәрова дадисиниң изини бесиватқан яш талант егиси. У студиядә вокал бойичә дәрис бериду. Ейтмақчи, Ипархан өткәндә елимиздики «Хочу стать звездой» телемусабиқисиға иштрак қилип, миң қатнашқучи ичидин топ йерип, талланған 30 балиниң қатаридин көрүнди һәм финалғичә йәтти…

Сәһәрдин Йүсүповниң асасий мәхсити – талантлиқ балиларниң кәспий дәриҗисини ашуруп, чоң пәллиләргә елип чиқиштин ибарәт. Шуңлашқа болса керәк, униң шагиртлири Украина, Венгрия, Болғария, Хитай мәмликәтлиридә болуп, талай конкурсларда мукапатлиқ орунлардин көрүнмәктә. Уларниң арисида чәт әлдин келип, Сәһәрдин акидин дәрис еливатқанларму бар. Шуларниң бири – өзбәкстанлиқ Умар Искәндәров. Өткәндә студия мудири Қирғизстандики «Мирлан Муратов продакшн» продюсерлиқ мәркизидин шу яқта сәнъәткә һәвәси бар балиларға маһарәт дәрисини өткүзүш бойичә тәклип апту. Бу болсиму, униң арзу-арманлириниң рояпқа чиқиватқанлиғидин дерәк бериватса керәк.

Шундақ қилип, «Азия плюсниң» «плюслиридин» вақип болуп, уларниң ишиға муваппәқийәт тиләп хошлаштуқ.

Абдулҗан АЗНИБАҚИЕВ.

http://uyguravazi.kazgazeta.kz/?p=25489#more-25489