| Джиу-Джитсуниң Яркәнттә 150 әзаси бар. | |
|
|
«Уйғур авази» гезити, 5 август, 2016 ж.
Шуни бирдинла тәкитләш керәкки, җумһурийитимизниң пайтәхти Астанадики Джиу-Джитсу спорт академиясигә бәш жилдин бери жутдишимиз, тонулған җәмийәт әрбаби, һели мәрһум Турғанҗан Розахуновниң оғли Арманҗан рәһбәрлик қилмақта. Спорт академиясиниң җумһурийитимизниң җай-җайлирида шөбилири ечилип, өсмүрләрниң спортниң бу түри билән шуғуллиниватқанлиғи һәркимни хошал қилиду. Арманҗанниң әндики мәхсити — өзи туғулуп өскән ана жутида Джиу-Джитсу билән шуғуллинидиған спортсөйәр өсмүрләрни жиғип, сағлам һаят тәризини тәрғип қилиш еди. Йеқинда униң бу арзуси рояпқа чиқип, Яркәнт шәһиридики Ербол Сипатаев намидики кочиниң бойида қәд көтәргән «Арайлым» сода мәркизиниң биринчи қәвитидә спорт залиниң ечилиш тәнтәниси болуп өтти. Униңға Астана вә Алмута шәһәрлиридин көплигән спорт маһирлири,меһманлар кәлди.
— Елимиз Президенти Нурсултан Назарбаевниң һәр жили қазақстанлиқларға йоллаватқан Мәктүплиридә елимиз яшлириға сағлам һаят тәризини тәрғип қилиш мәхситидә өсмүрләрниң спортниң у яки бу түри билән шуғуллинишиға зәмин яритишни йәрлик һакимийәтләргә алаһидә тапшуруқ бәрмәктә, — деди Арманҗан тәнтәнидә. Бүгүнки спорт залиниң ечилиши униң бир испати. Бразилиялик оюнниң бу түри яш таллимайду. Униңға қизиқиватқан қизларму аз әмәс. Бүгүн биз спортниң бу түригә 150 жутдишимизниң хаһиш билдүргәнлигидин мәмнун болуватимиз. Келәчәктә ишқивазлиримизниң көп болуп, яркәнтлик спортчиларниң утуқ қазинидиғанлиғиға ишәнчимиз камил.
Тәнтәнидә Астанадин қәдәм тәшрип қилған Қазақстан хәлқи Ассамблеясиниң әзаси, Астана шәһәрлик Уйғур этномәдәнийәт мәркизиниң рәиси Рустәм Абдусаламов, икки дүркүн дуния чемпиони, икки дүркүн Европа чемпиони, Джиу-Джитсу спорт академиясиниң Алмутидики шөбисиниң мәшиқләндүргүчиси Қуат Сағиев, дуния чемпионатиниң күмүч медалиниң саһиби, мәшиқләндүргүчи Қалдар Абдықабыл сөзгә чиқип, спортниң бу түриниң яшлар арисида аммибаплиққа айлиниватқанлиғини тәкитләп, спорт сөйәр өсмүрләргә утуқ-муваппәқийәтләр тилиди. Андин Арманҗанниң аниси Һавагүл аниниң ақ тилигидин кейин, мәшиқләндүргүчиләр оюнниң тәләп-қаидилири билән тонуштуруп чүшәнчә берип, яркәнтлик спорт ишқивазлири билән мәшиқләрни өткүзди.
Гөһәрбүви ИСМАЙИЛҖАНОВА, Панфилов наһийәси. |
