«Уйғур авази», 23 июнь, 2016 ж.

Пәрзәнтлиримизниң кичигидә татлиққинә қилиқлириға амрақлиғимиз келип қалиду. Мәсилән, қолини көтирип, өзлиричә уссул ойнашлири, ихчам шеирларни ядқа ейтиши вә һаказилар. Әгәр ушбу адәтлири мәктәптә оқуватқан мәзгилидә давамлашса, техиму  хошал болуп кетимиз. Әнди ундақ талантлиқ балиларни тәрбийиләш ата-ана билән устазларниң қолида, әлвәттә. Балиларниң қабилийитини ашуруш үчүн улар бар күч-ғәйритини сәрип қилиду. Лекин бу азлиқ қилидекән.

Йеқинда хәлқимизниң милләтпәрвәр оғлани Мәхсәтҗан Қаһаров тәрипидин уюштурулған Һебибуллам Қаһаров намидики «Һошшәрә, яш талантлар!» оқуғучилар фестивалиниң тамашибини болуп қалдим. Өскиләң яш әвлатниң бу күни билим билән илимгә, сәнъәт билән әдәбиятқа, тарих билән мәдәнийәткә бәк қизиқиватқанлиғиниң гувачиси болдуқ. Бу хошал боларлиқ һадисә. Җумһурийәт миқиясида өткүзүлгән фестивальға иштрак қилип, өзлириниң талант-маһаритини көпчиликкә намайиш қилиш майиллиғи билән алаһидә көзгә челиққан балиларму болди. Мәсилән, шуларниң қатарида, махтанғанлиқ әмәс, бизниң  Ғәйрәт йезисидики Исмайил Саттаров намидики мәктәпниң  оқуғучилириму болди. Мукапатланған оқуғучиларни мәктивимиздә алайтән тәбриклидуқ. Шу күни жутимизниң инавәтлик мөтивәри Нурәхмәт ака Ибрагимов тәнтәнилик мәрасимда фестиваль иштракчилириға Челәк йезиси Мәдәнийәт өйидә Уйғур театри артистлири тәрипидин қоюлидиған драматург Әхмәтҗан Һашировниң «Ялғуз ялпуз» спектаклиға билет елип берип, өзиниң халисанә соғисини атиди. Мошуниң өзи сәнъәткә қизиқиватқан балилиримизниң кәспий артистлиримизниң маһаритини өз көзи билән көрүп, миллий нахша-сазлиримизни аңлап, тарихимиз билән мәдәнийитимизни чүшинип-билип, талантиға техиму қанат пүтүшигә зәмин болғанлиғи билән әһмийәтликтур. Шу күни оқуғучилиримиз театр артистлиридәк болушини арман қилди. Һазир улар өз алдиға көргән-билгәнлирини әмәлиятта қоллинишқа тиришмақта. Ейтай дегиним, жуқурида исми аталған акимизниң соваплиқ ишини давам қилсақ, нур үстигә нур болар еди. Әң болмиғанда, һәрким өз балимизға әшундақ шараит яритип бәрсәк, уларниң таллиған йолиға чирақ яққандәк болаттуқ.

Йеқинда Алмута шәһиригә тарихий вәтинимиздин артистлар келип, концерт қоюп кәтти. Униңғиму бардуқ. Лекин тамашибинлар арисида яшлиримиздин яшанғинилиримиз көп болди. Һә, оқуғучилиримиз тамамән йоқ десәкму болиду. «Мәңгүлүк мәшрәп» намлиқ музыкилиқ қоюлумниң яхши өткәнлиги шуниңдин ибарәтки, униң мәзмун-маһийити йәнә шу миллий тарихимизниң, мәдәнийитимизниң, әдәбиятимизниң, тилимизниң қәдир-қиммити һәм тәлим-тәрбийәгә қаритилғанлиғи билән муһимдур. Раст, чоңлиримизму Ана-топрақниң һидини елип кәлгән қериндашлиримиз билән үз көрүшүп, қәлб тәшналиғини қандуруш үчүн концертқа барди. Лекин мәшрәпниң тәлим-тәрбийисини балиларниң көргини әвзәл едиғу! Талантлиқ гөдәклиримиз уни тамашә қилғач, ата-бовилиримизниң мирас-ғәзнисидин, қедимий қәдрийәтлиридин көп нәрсиләрни үгәнгән болар еди.

Абдулҗан АЗНИБАҚИЕВ https://parvaz.kz/index.php/abduljan-aznibakiev

http://uyguravazi.kazgazeta.kz/?p=24800