«Уйғур авази» 21 апрель 2016 ж.

Йеқинда Билал Назим намидики оттура мәктивиниң уйғур тили вә әдәбияти пәнлириниң муәллимлири шаир һәм драматург Исмайил Саттаровниң туғулғининиң 100 жиллиғиға мунасивәтлик пән һәптилигини уюштурди. Униңда әдипниң иҗадийити кәң түрдә тәһлил қилинди. Әдипниң Дьяков билән бирликтә йезилған «Ғерип — Сәнәм» драмиси һәқиқәтәнму надир әсәр. Униңда адәмләр арисидики мунасивәт, пак муһәббәт тәсвирлиниду. Исмайил Саттарованиң иҗадийитидә мәзкүр драма асасий орунни егиләйду. Бу драма әсәр узун жиллардин бери җумһурийәтлик Уйғур театриниң сәһнисидин чүшмәй келиватқан, аммибаплиғини йоқатмиған әсәрлириниң бири болуп һесаплиниду. «Ғерип — Сәнәм» спектакли Қәлбинур Исқақова рәһбәрлик қиливатқан 9-синип оқуғучилиридин тәркип тапқан драма өмиги әзалири тәрипидин сәһниләштүрүлүп, ата-анилар диққитигә һавалә қилинди.

Пән һәптилигиниң йәкүнидә сөзгә чиққан мәктәп мудири Шеринай Һасанова һәптилик давамида Исмайил Саттаровниң «Ғерип — Сәнәм» драма әсәрини сәһниләштүргән устазлар билән оқуғучиларға тамашибинлар — ата-анилар намидин иллиқ тиләклирини изһар қилди. Шуниңдәк бийил Өмәр Муһәммәдий, Һезим Искәндәров охшаш шаир, язғучилар билән бирликтә жутдаш-шаир, журналист Нурәхмәт Әхмәтовниңму тәвәллудини мәктәп даирисидә атап өтүлүватқанлиғини тәкитлиди. Мудир бу күни оқуғучиларниң билим сапаси билән тәртип-интизами һәққидиму тохтилип, пән һәптиликлиридә, наһийәлик, вилайәтлик пән олимпиадилирида ғалип чиқиватқан оқуғучиларниң утуқ-муваппәқийәтлиригә тохталди.

Гөһәрбүви ИСМАЙИЛҖАНОВА.

http://uyguravazi.kazgazeta.kz/?p=23708