«Уйғур авази» гезити, 14 апрель 2016 ж.

Аваттики Мәдәнийәт өйигә Долқунҗан Розахунов мудир болуп тайинланғандин кейин йезида миллий мәдәнийитимиз билән сәнъитимиз тәрәққият йолиға чүшти. Униңға округ һакимийитиму, жут-җамаәтчиликму яр-йөләк болмақта. Буниңдин бәш жил бурун йезида «Баһар» ансамбли қурулди. Униң тәркивидә Аватниң һәм униң әтрапидики йезиларниң 50кә йеқин балиси бар. Қисқа вақит ичидә «Баһарниң» қол йәткүзгән утуқлириму из болмиди. Мәсилән, ансамбль әзалири наһийәдә өтүватқан барлиқ чарә-тәдбирләргә қатнишип, миллитимизниң бай сәнъитини намайиш қилиштин ташқири, наһийәлик, вилайәтлик вә җумһурийәтлик көрүк һәм фестивальларға иштрак қилип келиватиду. Йеқинда «Баһар» ансамбли Қазақстан Җумһурийитиниң Билим вә илим министрлиги тәрипидин уюштурулуп, Астанада өткән Х Хәлиқара «Ақ көгершін» балилар иҗадийити фестиваль-көрүгигә қатнашти. Униңға Россия, Қирғизстан вә Қазақстандин болуп 1500гә йеқин мәктәп оқуғучиси иштрак қилди. «Баһар» ансамбли лауреат атилип, мәхсус Кубок билән тәғдирләнди. Ансамбльниң бәдиий рәһбири Абдусемәт Василов вә хореографи Гүлмира Мәсимова «Әң яхши педагог» аталса, Ават йеза округиниң һакими Ерғали Байбөриев, Өмәр Муһәммәдий намидики мәктәпниң мудири Айгүл Нурқасимова вә Ават Мәдәнийәт өйиниң мудири Долқунҗан Розахунов балилар сәнъитини риваҗландурушқа қошуватқан һәссиси үчүн «Ақ көгершін» балилар фонди» җәмийәтлик бирләшмисиниң Тәшәккүрнамисиға егә болди.

Хәлиқара фестивальда Әмгәкчиқазақ наһийәсиниң шәнини көтәргән «Баһар» ансамблини жутдашлири тәнтәнилик күтүвалди.

– Тоққуз жилдин бери Ават йеза округиға рәһбәрлик қилип келиватимән. Мошу вақит ичидә йезимизда нурғунлиған өзгиришләр йүз бәрди. Әң муһими, ата-анилар бизниң келәчигимиз балилиримизда екәнлигини һис қилмақта. Шуңлашқиму бүгүнки утуқ пәқәт балиларниңла әмәс, ата-аниларниңму утуғи. Йәнә бир ейтип кетидиған нәрсә, Астанаға сәнъәткар балилиримиз билән берип кәлгән атиларму бар. Улар – Үсүпҗан Қәмбәров билән Тайирҗан Сайитов. Мошу йәрдә Үсүпҗан акиниң исмини алаһидә атап өткүм келиду. Сәвәви, 80 яшлиқ ақсақал муһим әһмийәткә егә бу сәпәрдә йолниң жирақлиғиға қаримай, икки нәврисигә һәмра болди, – деди балиларни күтүвелишта беғишланған мәрасимни ачқан Ават йеза округиниң һакими Ерғали Байбөриев.

Мәрасим давамида сөзгә чиққучилар «Баһар» ансамблиға иҗадий утуқ тиләп, өзлириниң алий изгү-тиләклирини изһар қилди.

Тәнтәниниң ахирида Хәлиқара «Ақ көгершін» фестивалиниң ғалиби «Баһар» ансамбли жутдашлирини әвришим уссуллири, йеқимлиқ саз вә нахшилири билән бәһримән қилди.

Рашидәм РӘҺМАНОВА.

Әмгәкчиқазақ наһийәси. http://uyguravazi.kazgazeta.kz/?p=23572#more-23572