"Уйғур авази" гезити, 25 март 2016 ж.

Йеқинда Қәйнәзәр йезисиниң Мәдәнийәт өйидә Үмселимәм Ниязованиң рәһбәрлигидики «Баһар» уссулчилар ансамблиниң һесават концерти болуп өтти.

Үмселимәм 5 йешидин уссул ойнашқа башлиған. Униң устази – Азат толуқ әмәс оттура мәктиви музыка пәниниң муәллими Гүлзарәм Сулайманова. Гүлзарәм һәдә бу әҗайип қабилийәтлик, сәнъәткә бөләкчә қизиққан қизчаққа алаһидә диққәт бөлүп, 9-синипни тамамлиғичә уйғур хәлқиниң нурғунлиған әвришим уссуллирини үгитип чиқиду. Мәктәп мудири Иврайим Исмәковниң қоллап-қувәтлишиши билән Әмгәкчиқазақ наһийәси вә Алмутида вилайити миқиясида өткән конкурсларға қатнишиду. Үмселимәмниң утуқлири сүпитидә 2011 вә 2013-жиллири вилайәтлик «Жетісу жұлдыздары», «Чер лидер» байқашлириниң ғалиби аталғанлиғини тилға елишқа болиду.

Мана бирнәччә жилдин бери Үмселимәм Раһат йеза округида өмәк ечип, уссулға қизиққан гөдәкләрни тәрбийиләп келиватиду. Һазир бу өмәккә 5 — 16 яш арилиғидики 30 оғул-қиз қатнишиду. Үмселимәмниң һесават концертида мана шу яш иҗрачилар қазақ, уйғур, өзбәк вә башқиму хәлиқләрниң уссуллирини алаһидә маһарәт билән орунлап, йеза-йезилардин кәлгән сәнъәтхумар тамашибинларниң алқишиға сазавәр болди.

– Бийил бәшинчи һесават концертини бериватимиз. Көрүватисиләрки, балиларниң кәйпияти үстүн, улар өз утуқлиридин рази. Уларға қарап, мәнму хошал. Чоң-чоң сәһниләрдин көрүнмисәкму, наһийәдә уюштурулуватқан барлиқ чарә-тәдбирләргә қатнишип, жутниң көңлидин чиқиватимиз. Концертимизға асасән йеза турғунлири кәлгәнликтин, билетларниң баһасиму қиммәт әмәс, бари-йоқи 500 тәңгә. Мәхсәт – һүниримизни, әмгигимизни көпкә көрситиш. Концерттин чүшкән мәбләғни болса, топ әзалириниң кийимлиригә сәрип қилимиз. Пурсәттин пайдилинип, маңа сәнъәт йолида ярдәм қолини сунған устазлирим Иврайим Исмәковқа, «Диларам» ансамблиниң рәһбири Юнус Имировқа вә Гүлзарәм Сулаймановаға сәмимий миннәтдарлиғимни иһзар қилғум келиду. Шундақла бизни қоллап келиватқан Қәйнәзәр Мәдәнийәт өйиниң мудири Райхан Жанбосыновадинму чәксиз разимән, – дәйду Үмселимәм.

Концерт ахирида наһийәлик Уйғур этномәдәнийәт мәркизиниң рәиси Сулайман Мәхсүтов, наһийәниң чоң жигитбеши Турсунмәһәмәт Абдусемәтов, Ишиктә регионлуқ Ханим-қизлар кеңишиниң рәиси Нурбүви Насирова вә Қәйнәзәр Мәдәнийәт өйиниң мудири Райхан Жанбосынова сөзгә чиқип, сәнъәткә иштияқ бағлиған, тамашибин алқишиға еришкән гөдәкләрни тәбрикләп, иҗадий утуқлар тилиди, Үмселимәмгә миннәтдарлиқ билдүрди.

Рашидәм РӘҺМАНОВА.

Әмгәкчиқазақ наһийәси.
http://uyguravazi.kazgazeta.kz/?p=23188#more-23188