«Уйғур авази» гезити, 17 март 2016 жил

«Doppalіfe.com» интернет портали әтрапиға жиғилған уйғур яшлири өткән һәптидә җәнубий пайтәхтниң «Dіscount Bar» диско барида «Допиңиздин өргиләй» намлиқ кәч уюштурди. Кәчниң алаһидилиги шуниңдин ибарәтки, бу йәргә жиғилғанларниң һәммиси уйғурниң миллий дописида кәлди. Әнди дописи йоқлар шу күни залда көпчилик диққитигә һавалә қилинған түрлүк-түмән допилардин өзлиригә яққинини сетивелип, кәч меһманлириға қошулди.

Кәчниң ечилиш мәрасимида «Пәрваз» иҗрачилар бирләшмиси рәисиниң орунбасари Райим Һәмраев миллий түс алған ушбу мәрасим меһманлирини сәмимий тәбриклиди. Уйғур яшлириниң бешини қошуватқан интернет порталниң асасини салғучи һәм бу муһим чарә-тәдбирниң уюштурғучиси Сүлфи Мәшрәпов болса, әҗдатлиримиздин мирас қалған допа һәққидә чүшәнчә берип, бүгүнки кәч беваситә униңға беғишланғанлиғини вә яшлиримизниң миллий мәдәнийитимизгә дегән көзқаришини яхшилаш мәхситидә өткүзүлүватқанлиғини ейтип өтти. Андин кәчниң турақлиқ риясәтчиси Ялқун Нурахунов меһманлар арисида «Допиңиздин өргиләй» мавзусида конкурс уюштуруп, өзиниң хуш чақчақлири арқилиқ иштракчиларға көңүллүк кәйпият һәдийә қилди. Яш сәнъәткарлар Әхмәтҗан Тайиров, Расул Зайитов вә «Дилдар» топиниң әзалири йеқимлиқ нахша-сазлар билән кәч меһманлириниң көңлидин чиқти.

Әнди чақчаққа кәлгәндә һечкимни алдиға өткүзмәй, көпчилик арисида аммибаплиққа айлиниватқан «VAY TANG» дуэти кәчниң техиму қизиқарлиқ өтүшигә зәмин яратти. Буниңдин ташқири, Юсуф Бадмус билән Наиль Һезбақиевниң иҗрасидики уйғурчә нахшиларни, Бәхтияр Имранниң «Уйғур дописи» намлиқ уссулини вә «Долан» ансамбли әзалириниң жуқури маһарәт билән орунлиған әвришим уссуллирини тамашибинлар чоңқур тәсират илкидә қарши алди. Әлвәттә, бу күни «Doppalіfe.com» командиси һәрдайим қоллап-қувәтләп келиватқан яш һәвәскар сәнъәткарлар, җүмлидин Рустәм Тохтахунов, Гүлмира Йолдашева, Расул Иминов вә «Хумар» топлириму өз һүнәрлирини намайиш қилди.

Умумән, уйғурниң миллий дописини туғ қилип, униң тарихидин хәвәр тапқан яшлар пуғани қанғичә көңүл көтәрди һәм келәчәктә мошундақ мәрасимларда пат-пат учришишқа келишти.

Мәшүр САСИҚОВ.

http://uyguravazi.kazgazeta.kz/?p=23106#more-23106