«Уйғур авази» гезити, 29 апрель 2015 ж.

Мукапат мубарәк!/ Йеқинда Челәк йезисидики А.Бижанов намидики оттура мәктәпниң 10-синип оқуғучиси Саида Фурқәт (сүрәттә) Астана шәһиридә өткән хәлиқара «Ақ көгершін» фестивалиға иштрак қилип, мукапатлиқ ІІІ орунға еришти. У һәрхил милләтләрниң уссуллирини жуқури маһарәт билән иҗра қилиш арқилиқ, җумһурийәтниң җай-җайлиридин кәлгән 700гә йеқин қатнашқучилар арисида ғалип аталди.Саиданиң әвришим уссуллири бу қетим көплигән тамашибинларда алаһидә тәсират қалдурди. Униң һәқиқий талант егиси екәнлигигә қайил болған улар Саиданиң һәрбир уссулини алқишлар билән қарши алди. Шундақла яш иҗрачиларниң һүнәрлирини баһалиған адил қазилар уйғур қизиниң талантини қанаәтлиниш илкидә тилға елип, униң келәчәктә тонулған сәнъәткар болуп йетилидиғанлиғиға ишәнчә изһар қилди.

— Мән бу утуқларға анам Рәнагүл Василдинова вә һәдәм Рошәнгүлниң қоллап-қувәтлиши түпәйли йәттим — дәйду Саида хошаллиғини йошуралмай. — Чүнки улар маңа мәйли кийим-кечәк тәрәптин яки мәбләғ җәһәттин болсун, имканийитиниң йетишичә барлиқ шараитларни яритип беришкә тиришти. Уларға чин қәлбимдин миннәтдарлиқ билдүримән.

Тәкитләш лазимки, яш уссулчи Саида сәһнидики һүнири билән өзи истиқамәт қиливатқан тәвәдиму көплигән байқаш-көрүкләрдә муваппәқийәт қазанған. Буниңдин ташқири, кичигидин уссулға иштияқ бағлиған у наһийә даирисидә болуп туридиған мәдәний чарә-тәдбирләр билән җәмийәтлик ишларниң паал иштракчисидур.

Өз новитидә, бизму сәнъәт дуниясиға йеңидин қәдәм ташлиған яш уссулчи Саида Фурқәтниң техиму егиз пәллиләрдин көрүнидиғанлиғиға ишинимиз.

Банигүл МЕҖИТҚИЗИ.

Әмгәкчиқазақ наһийәси.

http://uyguravazi.kazgazeta.kz/?p=18182#more-18182