«Уйғур авази» гезити, 16 апрель 2015 ж.

Һошшәрә яшлар! Йәкшәнбә күни җәнубий пайтәхттики «Қазақконцерт» залида «Бирлик» җәмийәтлик фондиниң уюштуруши билән «Хушхойлар вә тапқурлар клубиниң» финали болуп өтти. Уни мәзкүр оюнниң уюштурғучиси һәм жүргүзгүчиси Һаким Тохтахунов киришмә сөз билән ечип, командиларни вә бүгүнки мусабиқиниң адил қазилирини тонуштурди.Бу қетим финалға бәш команда, йәни «Яшлиқ» (Яркәнт), «Допиңиздин өргиләй» (Талғир нәһийәси) вә Алмута шәһиридин «ТуркАз», «Татлиқ җанлар» вә «Маde іn гимназия» командилири қатнашти. Улар бу қетимқи оюн 12-апрель — Космонавтлар күнигә тоғра кәлгәнликтин, асасән мошу мавзу әтрапида өз маһарәтлирини намайиш қилди.

Мусабиқә давамида командилар төрт басқуч бойичә бәс-бәскә чүшүп, өзара күч синашти. Болупму командиларниң жиғилишиға беғишланған видеоролик тамашибинлар тәрипидин алқишқа сазавәр болди. Шундақла нурғун мәшиқләр вә һазирҗаваплиқ билән тапқурлуқни тәләп қилидиған бу синақта «хушхойлар» һәртәрәплимә қабилийәтлик екәнлигини көрсәтти.

Финал йәкүни бойичә 134 пай топлиған «Татлиқ җанлар» командиси І орунға егә болса, «Яшлиқ» билән «Допиңиздин өргиләй» мукапатлиқ орунлардин көрүнди.

Ахирида адил қазилар топи сөзгә чиқип, тамашибинларға алаһидә көтирәңгү кәйпият беғишлиған «Хушхойлар вә тапқурлар клуби» әзалириға миннәтдарлиқ билдүрүп, паалийәтлиригә утуқ тилиди.

Фируза НӘВИРДИНОВА.

Алмута шәһири.

http://uyguravazi.kazgazeta.kz/?p=17962#more-17962