«Уйғур Авази» гезити, 19 март 2015 ж.

Баһар чәшмиси/ Пәсилләр әркиси — баһарниң дәсләпки күнлири Қ.Ғоҗамияров намидики җумһурийәтлик дөләт Уйғур музыкилиқ комедия театри анилар билән ханим-қизларға һәқиқий мәйрәмлик соға һәдийә қилди. Төрт күн давамида Хитай Хәлиқ Җумһурийитиниң І дәриҗилик артистлири Мәмтимин Турғун билән Пәридәм Мамутниң иштрак қилишида чоң концерт болуп өтти. «Бир җүп сәнъәт чолпанлири» дәп даңқи чиққан бу сәнъәткарлар миллий саз әсваплирида бир-биригә җор болған һалда қазақстанлиқ тамашибинларға жуқури кәйпият беғишлиди. Мәйрәмлик концерт давамида улар тәрипидин иҗра қилинған муңлуқ нахша-саз вә әвришим уссулларға қарап Мәмтимин Турғунниң һәқиқәтәнму равапниң «қулиғида ойнайдиғанлиғи», әнди Пәридәм Мамутниң болса, кқпқирлиқ маһир сәнъәткар екәнлигини көрүшкә болатти.

Шундақла мәзкүр концертта Қазақстан Җумһурийитиниң хизмәт көрсәткән артистлири Руқийәм Саттарова билән Реһангүл Мәхпирова вә Махмут Дәраев заманивий миниатюриларни иҗра қилип, ханим-қизларниң бир дәм болсиму турмуш еғирчилиқлирини унтуп, хошаллиқ дәмлиридин бәһирлинишигә имканийәт яратти. Болупму «Әпсус, шундақ ишларму болиду», «Җәриманниң ақивити» вә «Раст-ялғини арилаш чақчақ» намлиқ миниатюрилар тамашибинлар тәрипидин иллиқ қарши елинди.

Тәкитләш керәкки, мәзкүр концертқа анилиримиз билән ханим-қизлиримизни мәйрими билән тәбрикләп, Қазақстанниң эстрада юлтузи Дилназ Әхмәдиеваму кәпту. У йеқинда көпчиликниң диққитигә һавалә қилған йеңи альбомидин бир җүп нахшисини тәғдим қилди.

Ахирида театр мудири Савутҗан Сонуров тамашибинларни мәйрәм билән тәбриклигәч, бүгүнки концертниң меһманлириға миннәтдарлиқ изһар қилди.

Мәшүр САСИҚОВ.

***

Йеқинда Ават йезисиниң Мәдәнийәт өйидә Хитай Хәлиқ Җумһурийитиниң дөләтлик І дәриҗилик артистлири Пәридәм Мамут билән Мәмтимин Турғунниң қатнишиши билән концерт болуп өтти.

Концертқа күлкә маһири, җумһурийәтлик «Жас алаш» һәзил-күлкә конкурсиниң лауреати Саһибәм Норузова риясәтчилик қилди. Икки сааттин ошуқ вақит давамлашқан концертта «Мәмтимин равап» вә «Тәңритағ булбули» аталған сәнъәт маһирлири Мәмтимин Турғун вә Пәридәм Мамут нахшилирини дутар һәм гитара билән орунлап, өзлириниң һәқиқий талант егилири екәнлигини намайиш қилди. Шундақла Қазақстанниң хизмәт көрсәткән артистлири Руқийәм Саттарова, Реһангүл Мәхпирова, Нуралим Варисов, Саһибәм Мәшрәповаму көпниң көңлидин чиқип, тамашибинларниң алқишиға бөләнди.

Рашидәм РӘҺМАНОВА.

Әмгәкчиқазақ наһийәси.

http://uyguravazi.kazgazeta.kz/?p=17487