«Уйғур авази гезити» 12 февраль 2015 ж.

«Сәһнидә – Гүлнарә Сайитова!» Бу атақлиқ уссулчинин балилиғидики әң яхши көридиған ибариси еди.

Гүлнарә Сайитованиң  http://www.parvaz.kz/index.php/gulnara-saitova ата-анисиму тонулған сәнъәткарлардин болуп, уларму мәзкүр саһада мәлум дәриҗидә өзлириниң из-тамғисини қалдурди. Гүлнарә Үсүпҗан қизи, башқа сәнъәткарларниң пәрзәнтлири охшаш, гөдәк пәйтидин башлап, «театрниң балиси» болди. Чүнки артистларниң көпчилиги гастрольларға барғанда, балилирини өзлири билән биллә елип жүридиған. Артистлар чүшкән өйидә концерт башланғичә бираз дәм алидиған адити бар еди. Шундақ пәйтләрдә өй егилири билән уларниң һәләкчилигидә жүргән жут активистлириға артистларниң балилири өз һүнәрлирини көрситәтти. Алди билән «сәһнигә» нахшичиларниң балилири чиқиду. Кейин «концертни» сазәндиләр билән уссулчиларниң балилири давамлаштуриду. Новәт Гүлнарәгә кәлгәндә һәммиси чуқуришип кетидиған. Чүнки у уссулни кичигидин яхши ойнатти. Мундақ «сорунларда» «бу қиз атақлиқ дапчи Үсүпҗанниң қизи» дәп уни көпчилик махтапла кетидиған. Әйнә шундақ қилип, сәнъәткарлар гастрольларда өзлириниң һарғинини сәзмәтти.

— Мән алтә яшқа кәлгәндә ата-анамниң ағинилири бизниң өйгә алайтән мениң уссулумни тамашә қилғили келәтти, — дәйду Гүлнарә Үсүпҗан қизи балилиғини әсләп. — Шу вақитта мән дадам ясап бәргән кичиккинә сәһнигә жүгрәп чиқип, алди билән елип барғучиниң хизмитини атқуримән. «Сәһнидә — Гүлнарә Сайитова!» дәймәндә, жүгрәп берип, илдам көйнигимни алмаштуруп уссул ойнаймән. Мән көпинчә дап уссулини яхши көрәттим. Мениң һәрикәтлиримдин ата-анамниң  мәшрәп әһли пуғани қанғичә дәм алаттекән. Буни кейин маңа дадам сөзләп бәрди. У иштин һерип кәлгинидә мениң билән ойнап һадуғини чиқиратти. Униң ейтишичә, мән «дүм-тақтин» башқини билмәттимкән. Мошу сөзләрни аңлиғандин кейин дадам қолиға дапни елип мени уссул ойнитаттекән.

Мениң биринчи синипқа барған вақтимму задила ядимдин чиқмайду. Дәсләпки устазим Лидия Петровнаниң қияпити һелиғичә көз алдимда туриду. Бир-икки синипдишимму есимда қапту. Шуларниң бири — шагиртим һәм кәсипдишим Зоһра Кәримованиң дадиси. Балилиқта йәнә бир алаһидә есимда қалғини, мән, хаталашмисам, он үч яшқичә пәқәт оғуллар билән арилишаттим. Ләңгә, ошуқ, вәлләй ойниғандиму улардин һеч қелишматтим. Бу «қилиғимни» Алмутиға мәхсус музыка мәктивигә оқушқа чүшкәндә бирақла ташлидим.

Гүлнарә Сайитова бүгүнки күндә хәлқимизгә тонулған уссулчи. Әву бир жили Үсүпҗан атимиз тирик пәйтидә бир сорунда риясәтчи уни «бу акимиз атақлиқ уссулчи Гүлнарә Сайитованиң дадиси болиду» дәп тонуштуруведи Гүлнарә Үсүпҗан қизи униң гепигә түзитиш қилип, һәзил арилаш: «Өз вақтида мән атақлиқ дапчиниң қизи болған» дегән еди.

Бәхтишат СОПИЕВ.

http://uyguravazi.kz/?p=17021#more-17021