| «Жусан» | |
|
|
«Жусан». «Уйғур авази» гезити, 25 декабрь 2014 ж.
0-11-декабрь күнлири Астана шәһиридики «Астана опера» театрида Қазақстанниң Мустәқиллик күнигә беғишланған «Астана балет» дөләт театриниң Мукарәм Авакри сәһниләштүргән «Жусан» намлиқ бир актлиқ балети намайиш қилинди. Премьера болған күнлири һава райиниң соғлиғиға қаримай, залға тамашибинлар лиқ толди. Уларниң ичидә Мәҗлис депутатлири, министрлар вә башқиму лавазимлиқ шәхсләр, вилайәт мәркәзлиридин кәлгән театр вә филармония рәһбәрлири, алий вә оттура билим дәргаһлириниң вәкиллири, Абай намидики опера вә балет театриниң хадимлири болди. «Жусан», — «Астана балетиниң» дәсләпки сәһниләштүргән биртуташ надир әсәри. Мәзкүр қоюлум «Келин», «Самум», «Әмән», «Кентаврлар», «Көктин соға», «Очилиқ», «Жут», «Ойғиниш» вә «Чапқун» кәби тоққуз бөлүмдин ибарәт.
Спектакльда Қуат Шилдебаев, Сергей Рахманинов кәби түрлүк жанрларда иҗат қилидиған композиторларниң музыкилири пайдилинилған. Бу һәрхил жанрдики музыкилиқ әсәрләр бир-бирини утуқлуқ толуқтурүп, «Жусанда» пластика вә декорацияләрниң өзгириши билән раван муҗәссәмләнгән.
Сәһнә декорациясидә көрүлгән Бетпақ дала тақирлири, ямғурдин кейин көкәргән бепаян дала, әмәнниң аччиқ пуриғи, қаттиқ иссиқтин кейин қара исқа чөмүлгән дала көрүнүши, жут вә қумларниң көчүши балет уссулида жуқури маһарәт билән тәсвирләнгән. Сәһнидә егиз һарву чеқиниң анда-санда пәйда болуши вә йоған чақни назук қизларниң таққа иштирип чиқириши һаят вә күрәштин дәрәк берип туриду. Балетниң кульминацияси интайин чирайлиқ сәһниләштүрүлгән болуп, оттузчә балет уссулчисиниң қатнишидики композицияси билән тамамланди.
Спектакль аяқлашқандин кейин сәһнигә баш режиссер Мукарәм Авакри чиқип, тамашибинларға тазим қилғанда, һәммә орунлиридин туруп «апирин!» ейтишип, кәң залда гүлдирас чаваклар яңриди. Премьеридин кейин сөзгә чиққан Т.Жүргенев намидики Қазақ миллий сәнъәт академиясиниң ректори Бибигүл Нүсипжанова билән хореография факультетиниң декани Дмитрий Сушков, Селезнев намидики хореография училищесиниң рәһбири Гүлмира Базарбаева вә бәдиий рәһбири Майра Қадирова «Астана балет» театриниң баш режиссери Мукарәм Авакриниң өзлириниң билим дәргаһлирида тәһсил көргәнлигидин пәхирлинидиғанлиғини тәкитләп, шагиртиниң йәниму жуқури чоққиларға көтирилишигә сәмимий тиләкдашлиқ билдүрди. Ю.Лермонтов намидики Рус драма театриниң мудири Юрий Якушев: «Мән мәзкүр балетниң қандақ башлинип, қандақ түгигәнлигини сәзмәй, көз алалмай тамашә қилдим! Бу ХХІ әсирниң балети!», — дәп һаяжанлиғини йошуралмиди. «Астана балет» театриниң бәдиий рәһбири Алила Әлишева болса, «Жусан» театр репертуарида турақлиқ орун алидиғанлиғини, Мукарәмдин чоң үмүтләр күтидиғанлиғини изһар қилди. Мәҗлис депутати Мурат Әхмәдиев, Қазақстан хореографлар кеңишиниң рәиси Дүйсенбек Накипов вә башқиму меһманлар Мукарәм Авакрини мубарәкләп, келәчәк паалийитигә утуқлар тилиди. Өз новитидә, Мукарәм Сайидһаким қизи натиқларға чоң рәхмитини, уссулға үгәткән устази Гүлнарә Сайитоваға чоңқур миннәтдарлиғини сәмимий изһар қилди. Абдуллам САМСАҚОВ. Астана шәһири. СҮРӘТЛӘРДӘ: 1. М.Авакри. 2. Балеттин көрүнүш. |
