| Уйғур театриниң 80 жиллиғи нишанланди | |
|
|
Уйғур театриниң 80 жиллиғи нишанланди.
«Уйғур авази» гезити, 25 декабрь 2014 ж.
Өткән һәптидә Қ.Ғоҗамияров намидики җумһурийәтлик дөләт Уйғур музыкилиқ комедия театриниң қурулғининиң 80 жиллиғи дағдуғилиқ нишанланди. Униңға Қазақстан Җумһурийити Парламентиниң биртоп депутатлири, Қазақстан хәлқи Ассамблеясидин, Қазақстан Җумһурийити Мәдәнийәт вә спорт министрлигидин, Алмута вилайити вә Алмута шәһири һакимийәтлиридин вәкилләр, театр әрбаплири, наһийә һакимлири, этномәдәнийәт мәркәзлириниң рәислири, җәнубий пайтәхтимиздә паалийәт елип бериватқан қазақ, рус, корей, немис театрлириниң рәһбәрлири қатнашти.Дөләт Гимни орунланғандин кейин меһманларға Уйғур театриниң тарихиға аит һөҗҗәтлик фильм көрситилди. Андин риясәтчиләр Аминәм Һүсәнова билән Бәхитҗан Авдунов қазақ вә уйғур тилида көпчиликни мәзкүр сәнәниң мәхсәт-муддиаси билән тонуштурди. Шуниңдин кейин сөз новитини алған Қазақстан Җумһурийитиниң Мәдәнийәт вә спорт министри Арыстанбек Мухамедиулы Уйғур театриниң бу шанлиқ мәрикиси билән қизғин һәм сәмимий тәбрикләп, өзиниң иллиқ ләвзини билдүрди. Андин у Қазақстан Җумһурийитиниң Президенти Нурсултан Назарбаевниң Тәбрик хетини оқуп бәрди вә талантлиқ сазәндә Марат Норузовқа «Қазақстанның еңбек сіңірген қайраткері» пәхрий унванини, театр мудири Савутҗан Сонуровқа «Ерен еңбегі үшін» медалини вә театр хадимлири Алимҗан Тоқаевқа, Рашидәм Һәмраеваға, Мерванәм Һошуроваға «Мәдениет саласының үздігі» бәлгүсини тапшурди.
Алмута шәһири һакиминиң орунбасари Зәуреш Аманжолова тәнтәнә қатнашқучилириға иллиқ ләвзини билдүргәч, шәһәр һакими Ахметжан Есимовниң Тәбригини оқуп бәрди. Андин сөз новитини алған Қазақстан хәлқи Ассамблеяси Рәисиниң орунбасари Ералы Тоғжанов көпмилләтлик мәмликәттики хәлиқләрниң, җүмлидин уйғурларниң әл тәрәққиятиға, паравәнлигигә қошуватқан төһписи һәққидә ейтип өтти һәм ушбу сәнәниң пәқәт уйғурлар үчүнла әмәс, бәлки мустәқил Қазақстандики барчә хәлиқниң сәясий, мәдәний әһмийәткә егә муһим чарә-тәдбир екәнлигини, униң мәмликәттики хәлиқләр достлуғини, милләтләрара разимәнликни вә турақлиқни мустәһкәмләштә чоң роль ойнайдиғанлиғини алаһидә қәйт қилди. Сөзиниң ахирида у уйғур тилида мәзкүр мәрасимни уюштурғучиларға сәмимий миннәтдарлиғини билдүрүп, көпчиликни бу шанлиқ мәрикә билән сәмимий тәбриклиди вә «Нава» ансамблиниң бәдиий рәһбири Ниязҗан Турсуновқа ҚХАниң «Бирлік» алтун медалини вә бир топ сәнъәткарларға Қазақстан Җумһурийити Президентиниң Пәхрий ярлиғи билән Тәшәккүрнамисини, шундақла ҖУЭМ рәиси Шаһимәрдан Нурумовниң Қазақстан хәлқи Ассамблеясиниң Кеңиши әзалиғиға, Уйғур театриниң мудири Савутҗан Сонуровниң ҚХАниң әзалиғиға қобул қилинғанлиғини тәстиқләйдиған гуванамиларни тапшурди. Шуниңдин кейин нутуқ сөзлигән Қазақстан Җумһурийити Парламентиниң депутатлири Ахан Бижанов, Қуаныш Султанов қазақстанлиқ уйғурларни бу шанлиқ мәрикиси билән тәбрикләп, өзлириниң иллиқ ләвзилирини билдүрди. Депутатлар шуниң билән биллә, уйғур хәлқиниң Түрк дуниясида алаһидә орунни егиләйдиғанлиғини һәм бебаһа сәнъәтни яритип, уни әвлаттин-әвлатқа яшнитип келиватқанлиғини, бай тарихи бар милләт екәнлигини алаһидә тәкитлигәч, Парламент Сенатиниң рәиси Қасым-Жомарт Тоқаевниң вә Парламент Мәҗлиси рәисиниң орунбасари Дариға Назарбаеваниң Тәбрик хетини оқуп бәрди. Парламент Мәҗлисиниң депутатлири Турарбек Асанов, Гүлмира Есимбаева, Бақытжан Исмағулов, авған урушиниң ветеранлири Николай Криминич, Қасымбек Аманжолов тәнтәнә қатнашқучилириға иллиқ тәбриги билән биллә Авғанстанда бәйнәлмиләллик борчини өтигән талантлиқ дапчи Абдуразақ Һәмраевни вә көрнәклик сәнъәткарлар Толунай Әйсарова билән Нураләм Қурванбақиевани җәңгивар медальлар билән тәғдирлиди. Тәнтәнә давамида Алмута вилайити һакиминиң мәслиһәтчиси Көйүмчан Өмәров, Уйғур наһийәсиниң һакими Алимҗан Тохтасунов, Панфилов вә Әмгәкчиқазақ наһийәси һакимийитиниң вәкиллири, СССР вә Қазақстан хәлиқ артисти Асанәли Әшимов, җәнубий пайтәхтимиздә паалийәт елип бериватқан қазақ, рус, корей, немис театрлириниң рәһбәрлири тәбрик сөзгә чиқип, соғилирини тапшурди. ҖУЭМниң Пәхрий рәиси, Алмута шәһәрлик мәслиһәтниң депутати Әхмәтҗан Шардинов театр коллективини шанлиқ мәрикиси билән қизғин тәбрикләп, уларға автобус ачқучини тапшурса, «Санаәтчиләр, тиҗарәтчиләр вә йеза егилиги хадимлири җумһурийәтлик ассоциациясиниң» президенти Дилмурат Кузиев Уйғур театрини қайта җөндәш ишлири қолға елинған жиллири өзиниң бу ишқа йеқиндин арилашқанлиғини һәм Уйғур наһийәсиниң шу вақиттики һакими Муратбәг Насировниң ярдәм қолини сунғанлиғини, һә, һазир болса, театрға һөкүмәт алаһидә көңүл бөлүватқанлиғини алаһидә тәкитлиди. Андин Дилмурат Пирмуһәмәт һаҗим оғли өз вақтида театрға маддий җәһәттин ярдәм қолини сунғанлиғини қәйт қилғач, театр мудири Савутҗан Сонуровқа «Нисан Альмера» йеник автомашинисиниң ачқучини тапшурди. Өз новитидә ҖУЭМ рәиси Шаһимәрдан Нурумов бу мәйрәмниң миңлиған жиллар давамида иҗил-инақ яшап келиватқан уйғур-қазақ хәлиқлириниң һәқиқий достлуғиниң ипадиси екәнлигини тәкитлиди һәм мустәқил Қазақстанда истиқамәт қиливатқан барлиқ милләтләргә, җүмлидин уйғурларға тәң һоқуқлуқ шараит яритип бериватқан Қазақстан Җумһурийитиниң Президенти Нурсултан Назарбаевқа, Қазақстан һөкүмитигә уйғурлар намидин миннәтдарлиғини билдүрди. Шаһимәрдан Үсәйин оғли бу тәнтәниниң сәясий, мәдәний әһмийәткә егә муһим чарә-тәдбир екәнлигини, униң хәлиқләр достлуғини, бирлигини, милләтләрара разимәнликни вә турақлиқни мустәһкәмләштә чоң роль ойнайдиғанлиғини қәйт қилип, биз, уйғурларниң, өзара өмлүк билән бирликни, инақлиқни туғ қилип, көп милләт яшаватқан Қазақ Елиниң гүллиниши үчүн өз һәссимизни қошушимиз керәклигини атап өтти.
Тәнтәнә ахирида «Нава», «Рухсарә» ансамбльлири әсирләр садаси —сирлиқ муқамлар садасини яңритип, тәшна жүрәкләргә һөзүрлүк беғишлиди. Қазақстан Җумһурийитиниң «Салтанат» дөләт уссул ансамбли, Корей музыкилиқ комедия театриниң уссулчилири, Н.Тлендиев намидики Қазақ дөләт академиялик «Отырар сазы» хәлиқ-чалғу әсваплар оркестри вә Қазақстан Җумһурийитигә хизмәт көрсәткән артисти Михаил Токарев, Абай намидики Қазақ дөләт академиялик опера вә балет театриниң солисти Гүлнара Сакишева, нахшичи Нуркен Аширов Қазақстан Җумһурийитиниң хизмәт көрсәткән әрбаби Җәмилә Серкебаева, Қазақстан Җумһурийитиниң хизмәт көрсәткән әрбаби Дилназ Әхмәдиева вә Дилшат Әхмәдиев, талантлиқ тәмбүрчи Марат Норузов йеқимлиқ нәғмә-навалардин чачқа чачти. Ейтиш керәкки, меһманларниң бесим көпчилигигә уйғур миллий чапанлири кийгүзүлди вә улар мәзкүр чарә-тәдбирни уюштурушқа тәшәббускар болған Қазақстан Җумһурийити Парламенти Мәҗлисиниң депутати Мурат Әхмәдиевқа, Уйғур театриниң мудири Савутҗан Сонуровқа вә башқиму исимлири аталмиған миллий мәдәнийитимиз җанкөйәрлиригә өзлириниң миннәтдарлиғини изһар қилди. Хулләс, миллий маарипимиз, миллий сәнъитимиз, миллий мәдәнийитимиз, умумән, миллитимизниң милләт болуп сақлинип қелиши үчүн имканийәт яритип бериватқан тарихта тапқинидин йоқатқини көп, шатлиғидин ғәшлиги тола миллитимизгә ғәмхорлуқ қиливатқан Қазақстан һөкүмитигә уйғурларниңму чин қәлбидин һаяҗанлиқ алқиш-садалири яңриди, бу кәчтә. Шәмшидин АЮПОВ. |
