Уйғур хәлиқ нахшилири – хәлиқ еғиз ижадийити дә кәң тарқалған жанрларниң бири. Әнди бу хәлиқ нахшилирини өз бабиға йәткүзүп орунлаш һәр бир талант егисиниң қолидин келиверидиған иш әмәс. Бу әлвәттә чоң издинишни, үнүмлүк әмгәкни, һәқиқий талантни тәләп қилиду. Мана мошу жанрни хәлиққә йәткүзүштә өзиниң зилва авази билән дилларни тәвритип тамашибин қәлб төридин орун елип келиватқан яш талант егиси – Муштәри Исламова. Муштәри чоң һәм яшлар арисидиму бирдәк абройға егә болуп келиватқан сәнъәткар.

Йеқинда  Муштәри Исламованиң Қуддус Ғожамияров намидики Жумһурийәтлик Дөләт Уйғур музыкилиқ комедия театрида Қазақстан Жумһурийтиниң Театрлар бирләшмисиниң вә «Пәрваз» уйғур ижрачилар бирләшмисиниң қоллап – қувәтлиши вә уюштурушида «Келиң меһман...» намлиқ йәккә концерти болуп өтти. Концертни шаирә, сәнъәтшунас Муштәриниң аниси Сумбат Ғениярова риясәтчилик қилди. Концерт давамида Муштәри хәлиқ вә ижадий нахшилардин, «Ләйлигүл», «Сиз билән...», «Тапмисаң», «Муқәддәс тилим», намлиқ вә башқиму ижадий нахшилар билән биллә муқамлардин муқәддимиләрни ижра қилди.

Шундақла исми көпчиликкә яхши тонуш атақлиқ нахщшичи Муштәриниң атиси Абләһәт Исламова Муштәриниң бу хошаллиғиға ортақ болуп өзиниң ижадийитидин «Сеғиндиңму?», «Бәргин хәвәр», «Йол болсун» охшаш нахшилиридин вә  илгири аммибаплиққа егә болған «Яшлиқ» топиниң репуртуаридин бир түркүм нахшиларни орунлап бәрди. Мәзкүр кәчниң алаһидә меһмини болған «Тажиниса» уссулчилар ансамблиниң һәр хил милләт уссуллириму тамашибин диққитини жәлип қилди. Концерт айиғида риясәтчи Сумбат Ғениярова шәхсән өз аилиси намидин концертниң өтүшигә йеқиндин өз ярдәм қолини сунған кишиләргә миннәтдарлиғини изһар қилди.  Бу күни сәнъәткарлар аилиси тәрипидин тәйярланған сәнъәт соғисидин тамашибинлар бәһир елип қайтти.

Молутжан Тохтахунов

ФОТОРЕПОРТАЖ С КОНЦЕРТА МУШТАРИ ИСЛАМОВОЙ