Open login
Главная Новости Карантиндин кейинки концерт
Карантиндин кейинки концерт
07.11.2021 13:32   

Карантиндин кейинки концерт

«Уйғур авази» гезити 04.11.21

Карантин башлинип, Уйғур наһийәлик Мәдәнийәт өйиниң зали чөлдәрәп қалған еди. Сәнъәткарлар сәһнини сеғинса, концертқа бериш хәлиқниң арминиға айланди. Уйғур наһийәси «йешил регионға» өткәндин буян, сақлиқ чарилиригә әмәл қилған һалда чарә-тәдбирләрни өткүзүшкә рухсәт берилди. Бу йеңилиқни тәшналиқ билән күткән «Арзу» ансамбли хәлиқниң арзусини әмәлгә ашурди.

Сабирәм ӘНВӘРОВА,

«Уйғур авази»

 

 

 

«Арзу» ансамблиниң «Өрлә, Вәтән!» дәп атилидиған новәттики концерти елимиз Мустәқиллигиниң 30 жиллиғиға беғишланди. Мәлә-мәлиләрдики концертларни һесапқа алмиғанда, наһийә мәркизидики концерт үч күнгә созулди. Йәни, үч күн бойи наһийәлик Мәдәнийәт өйиниң зали тамашибинларға лиқ толди. Сәһниниң пәрдиси ечилиштин бурун, залға һәрхил милләт вәкиллириниң кийимини кийгән ансамбль әзалири чиқип, көпчиликни Мустәқиллигимизниң 30 жиллиғи билән тәбрикләп, хошаллиқниң ипадиси сүпитидә чачқа чачти. Андин сәһнә төридин орун алған риясәтчиләр концертлиқ программини қош тилда елип маңди.

Икки саатқа созулған концерттин һөзүр алған тамашибинлар алқиш-чаваклирини айимиди. Ансамбль булбуллириниң орунлишидики йеқимлиқ нахшилар билән уссулчи қиз-жигитләрниң сәһнини чаң кәлтүргән миллий уссуллири хәлиқниң көңлидин чиқти. Болупму, һәқиқити билән һәзили арилашқан миниатюрилар тамашибинларға көтирәңгү кәйпият бәхш әтти. Кәч ахирида Мустәқиллигимизгә беғишланған нахша иҗра қилинди. Әшу пәйттә пүткүл зал орнидин дәс туруп, унтулмас тәсират әта қилған артистларға һөрмәт көрсәтти.

Концертниң йәкүн қисмида наһийәлик Уйғур этномәдәнийәт мәркизи намидин сөзгә чиққан Нурнисәм Рәхмәтҗанова ансамбль сәнъәткарлириға чоңқур миннәтдарлиғини билдүргәч, концертқа жиғилған җамаәтни Мустәқиллигимизниң 30 жиллиғи билән тәбриклиди. Үч күн мабайнида Мәдәнийәт өйиниң босуғисини атлиған хәлиқ «Арзуниң» концертидин чоңқур роһий озуқ елип, өйлиригә жуқури кәйпият илкидә тариди.

https://uyguravazi.kazgazeta.kz/news/46616

 

 
Интересный материал? Поделись с другими: