«Уйғур авази» гезити, 14 апрель 2016 ж.

Ершат ӘСМӘТОВ, «Уйғур авази». Этот e-mail адрес защищен от спам-ботов, для его просмотра у Вас должен быть включен Javascript / Өткән һәптидә хәлқимиз һаятиға мунасивәтлик йүз бәргән муһим вақиәләрниң бири «OTAU TV» телеширкити даирисидә «Тәңритағ» уйғурчә көрситишләр каналиниң ишқа қошулуши болди.

Уйғур җамаәтчилигиниң, болупму йезилиқ җайларда яшайдиған хәлқимиз вәкиллириниң хошаллиғи чәксиз. Бу тәбиий әһвал. Чүнки тәвлүк давамида телеэкранда концертлар, кинолар, мультфильмлар ана тилимизда көрситиливатса, буниңға қандақларчә хошал болмайсән?!

Йеңи каналниң ечилиши мунасивити билән хошаллиғини бөлүшүш үчүн редакциямизгә телефон қилғучилар көп болди. Улар гәпара телеканалниң келәчиги һәққидә пикир-тәклиплирини билдүрүшниму унтумиди. Уларға, әлвәттә, рәхмәт. Чүнки мундақ бир әһмийәтлик иш болуватқанда, униң тәғдиригә бепәрвалиқ билән қарашқа һәргиз болмайду. Шуңлашқа бизму миңлиған телетамашибинлиримизни тәбриклигәч, өзимизниң мәслиһәтлирини йоллашни тоғра көрдуқ. Бу пикирлиримизни уюштурғучилар «чәттә турувелип әқил үгәткәнлик» териқисидә әмәс, бәлки сәмимий тәклип сүпитидә қобул қилиду, дәп үмүт қилимиз.

Шундақ қилип, 2016-жилниң 7-апрелида «Тәңритағ» телеканали өз паалийитини башлиди. Бу тарихий вақиә болидиғанлиғи шүбһисиз. Шундақ екән, әнди гәп әнди бу ишниң тоғра йолға қоюлуп, нәтиҗилик давамини тепишида. Униң үчүн немә қилишимиз керәк? Бу җәһәттин биз, миллитимиз җанкөйәрлири сүпитидә, бирмунчә тәклипләрни бәрмәкчимиз.

Чүшинишликки, «Тәңритағ» синақ дәвридин өтүватқачқа, һазирчә пәқәт дәм елиш һәм көңүл көтириш канали ролини атқуруватиду. Әнди униң вәзиписиниң даирисини пәйдин-пәй кәңәйтип, сүпитини яхшилаш үчүн җәмийитимиз һаятиниң барлиқ саһалири бойичә мавзуларға беғишланған көрситишләрни барлиққа кәлтүрүш лазим. Болупму бүгүнки заман тәливигә мувапиқ әхбарат-аналитика программилири, ток-шоу вә һаказилар һавадәк һаҗәт. Мошу ейтилғанларниң һәммисини әмәлгә ашуруш үчүн, әлвәттә, салаһийәтлик мутәхәссисләрниң тәҗрибисидин үнүмлүк пайдиланғинимиз әвзәл. Тәләйгә яриша, улар аримизда бар. Өз вақтида «Алитағ» программисида паалийәт елип барған режиссер, журналистлиримизниң көпчилиги бүгүнки күндә ишсиз жүриду яки өзиниң мутәхәссислигигә тамамән ят саһаларда әмгәк қиливатиду. Мана шуларни җәлип қилиш әқилгә мувапиқтур.

Раст, жуқурида ейтилған пикирләрни әмәлгә ашуруш үчүн, хелила нурғун мәбләғ һаҗәт. Буниңға, әлвәттә, абонентлардин жиғилған пул азлиқ қилиду. Шуңлашқиму мундақ пәйттә хәлқимизниң жүригидә оти, қолида пули бар сахавәтлик инсанлар чәттә қалмаслиғи керәк. Уларниң моҗут вәзийәттә мәнмәнчилигини, өзара зиддийәтлирини бир чәткә қайрип қоюп, һәмкарлиқта һәрикәт қилиши муһим әһмийәткә егә. Шундақла, «һесаплиқ дуния» демәкчи, чүшкән пулни мәхсус қурулған комиссия өз назаритигә елип, һаҗәт болғанда абонентлар алдида һесавитини бериши лазим.

Биз өз пикирлиримизни «тәңдиши йоқ дана мәслиһәт» дәп һесаплаштин жирақмиз. Шуниң билән биллә телеканалниң ички ишиға арилишиш нийитимизму йоқ. Пәқәт ейтқанлиримизни келип чүшүватқан йол-йоруқлар қатарида қобул қилип, уларни

телеканалниң мәнпийитигә уйғун келидиғанлирини әмәлиятта пайдилинишни билсәк, шу купайидур. Йәни «мәслиһәтлик чапан калтә болмас» демәкчи, сәмимий пикирлиримизниң мәлум дәриҗидә уйғур телеканалиниң риваҗлинишиға пайдиси тегип қалармекин дегән үмүттимиз.

Йоқтин бар қилиш — тәс. Барни йоқитивәтмәк — асан. Әнсирәйдиғинимиз — миң бир мәшәқәтләр билән қолға кәлгән бу амитимизни өзимизниң әйивидин қолдин чиқирип қоймисақ болғини. Шуңлашқиму бу мәсилигә «уйғур» дегән намға лайиқ өмлүктә, бирликтә яндишайли.

Ақ йол саңа, «Тәңритағ!». http://uyguravazi.kazgazeta.kz/?p=23605#more-23605