«Тәйярлиқта өмлүк намайән болди...»

Болудуси қизиқ болған концертниң мана өз пәллисини тепип вақтиму йетип кәлди. Бир ай давамида интернет тор бәтлиридә, гезит-журналларда еланлири пәрваз қилип, тамашибинлириниң зор алқишиға егә болуп концерт шу вақитила қизиқ муназиригә айланған еди. Шундақ қилип 17-ноябрь күни Жолдасбеков намидики Студентлар сарайида  һәр қетимқидәк концертниң ахирқи һәм жавапкәр тәйярлиғи саат әтигәнлиги 10:00да башланди. Бу күни барлиқ концертқа қатнашқучилар, жүмлидин, әлвәттә  «Дияр» топи, «Дәрвишләр» топи, Нуралим Варисов, Яркәнт шәһиридә алаһидә қәдәм тәшрип қилған вә дәсләпки «ДИЯР» топиниң солисти Абдурешит Һошуров, скрипкичи Зульфия Әхмәтова, кейинки вақитларда пәқәт Қазақстандила әмәс бәлки МДҺ әллиридә исми көпчиликкә тонуш болуп сәнъитимиз беғиға қәдәм тәшрип қилған ғунчимиз Адель Шавдунова, чақчақчи Алимжан Бавдинов вә риясәтчиләр Гүлжан Жайсанбаева  вә Шатлиқ Худайқуловлар вә башқиму  «Пәрваз» уйғур ижрачилар бирләшмисиниң әзалири өзлириниң ярдәм қоллирини сунуп  сайипханларға техиму роһий мәдәт беғишлиди.

«.... Бүгүнки күн - биз үчүн мәйрәм»

У күни тәйярлиқ унчилик көп қийинчилиқни туғдурмиди. Чүнки технилик тәрәптинму һәр ким өзигә жүкләнгән бойичә өз хизмәтлириниң һөддисидин аллиқачан чиқип болған. Пәқәт бир барлиқ нахша-сазларни бир қур қайтилаш биләнла тәйярлиқ иши пүтти. Асасән  «Дияр» топиниң бүгүнки концертниң оптимистик көз қарашта ейтилған тиләкләр уларға техиму зор күч беғишлиди. Он жил мабайинида тамашибин қәлби төридин орун алған бу  «Дияр» топиниң у күнки кәйпияти тоғрисида сориғинимизда  мәзкүр топниң бәддий рәһбири Нурум Әхмәтов: «әлвәттә бүгүнки күн биз үчүн жавапкәрлик күнләрниң бири болсиму, лекин достлар билән һәм тамашибинлиримиз билән өткән бу күн биз үчүн мәңгү әстә қаларлиқ мәйрәм болуп қалиду »дегән жавапни ейтти.

«Сәнъәттә чегара йоқ...»

Шундақ қилип тамашибин көптин бери күткән  «Дияр» топиниң  «Илһам садаси» намлиқ концерти башланди. Залниң ичи лиққидә толған тамашибинлар.  Бу әлвәттә хошал қиларлиқ әһвал. Чүнки бу сайипханларға һәқиқәтәнму илһам беғишлайду. Дәсләптила  «Дияр »топи сәһнигә көтирилгәндә тамашибинлар уларни зор алқишлар билән қарши алди. Тамашибинларниң сөйүмлүк нахшилири болған  «Мениң нахшам», «Өмүр саңа ашиқ қалимән», «Унталмидим» «Гөзәл», «Сөйгән ярим» дегән нахшилири билән   бирликтә йеңи нахшилирини ижра қилди. Ейтмақчи, йеңи нахшилири тамашибин үчүн һәқиқәтәнму күтүлмигән соғилардин болди. Мәсилән, Адель Шавдунова билән бирликтә ижра қилған һиндстанлиқ композитор Джатин Лалит  музыкиси вә Абдумежит Дөләтов сөзигә йезилған  «Сөйгү садаси»  намлиқ лирик нахшисини ижра қилғанда һәр кимдә қандақту бир яхши һиссиятниң пәйда болғанлиғи талашсиз. Шундақла Ш. Қалдаяқов репертуаридин  «Цыган серенадиси» нахшисини миллий саз әсвапларда орунлиши вә Өзбәкстан эстрада юлтузи Озодбек Назарбековниң репертуаридин уйғурчә тәржимә қилған «Гөзәл» намлиқ нахшилирини иллиқ қарши елишидин һәқиқәтәнму сәнъәттә чегара йоқлуғидин дәрәк бәрсә керәк. Бирақ әлвәттә бу авторниң рухситидин әмәлгә ешиши керәк. Сәнъәттә чегара йоқ болғини билән өзигә чушлуқ қаидиси болиду әмәсму...

«...Көңүллүк кәйпиятта қайттуқ»

Өз новитидә концертқа техиму түс берип жан киргүзүп турған меһманлар һәқиқәтәнму ейтқинидәк  аз болсиму лекин саз болалиди. Мәсилән Нуралим  Варисов вә Абдурешит Һошуровларниң йеқимлиқ авазида жараңлиған нахшилар вә «Дәрвишләр» топиниң Африкиниң Мадакаскар аралида  мәхсус чүшүрүп кәлгән «Сөйгүнамә» нахшисиниң клипи, һәм сайипханлар һәм тамашибинлар үчүн Зульфия Әхмәтова миллий сазлиримизни скрипкида ойниши, өзбәкстанлиқ күлкә-чақ-чақ маһири Абид Асомовниң күлкә-чақчақлири  йәнә бир қетим күтүлмигән соғилардин болди. Өз новитидә йеқиндин һәм маддий һәм мәнивий жәһәттин ярдәм қолини сунған устазлириға вә Бурһандин Тажидинов рәһбәрлигидики мәшрәп әһлигә вә башқиму дост бурадәрлиригә өз миннәтдарлиғинип билдүрди. Һәммидин муһими һәр қандақ концерттин кейин униң баһаси тамашибин пикри. Бизму концерттин чиққан пәйттә бу һәқтә сорапму үлгәрдуқ. Уларниң көпинчисиниң бәргән жавави бирла :«Көңүллүк кәйпиятта кәлгән техиму көңүллүк кәйпиятлар илкидә қайттуқ». Шундақ жүрәктин чиққан жүрәккә йетиду дегән сөз бар. У күни «Дияр» топиниң тирик авази билән чин жүрәктин ейтқан нахшилири һәқиқәтәнму жүрәк төридин орун алғанлиғиға ишәнчимиз камил.

Молутжан Тохтахунов

Өз мухбиримиз