Open login
«Ирадә» журнали йоруқ көрди.
11.10.2013 14:06   

«Уйғур Авази» гезити, 11 октябрь 2013 ж,

Йеқинда Қ.Ғоҗамияров намидики җумһурийәтлик дөләт Уйғур музыкилиқ комедия театрида йеңидин нәшир қилинишқа башлиған  «Ирадә» журналиниң дәсләпки саниниң тонуштуруш мәрасими болуп өтти. Кәчниң мәхсәт-нишанини қисқичә баян қилғандин кейин, риясәтчиләр «Ирадә» журналиниң баш муһәррири Сүлһи Марат оғли Мәшрәповни сәһнигә тәклип қилди. У мәзкүр журналниң қандақ вуҗутқа кәлгәнлинигини ейтип, алға сүргән мәхсәт-нишанлирини тәпсилий чүшәндүрди. — Мән мәктәп босуғисини атлиғандила яхши оқушқа тириштим. Китап, гезит вә журналларни оқушқа қизиқтим. Бара-бара тарихий, бәдиий әсәрләрсиз өзәмни тәсәввур қилалмайдиған дәриҗигә йәттим,— деди Сүлһи русчә раван сөзләп. — Уйғур хәлқиниң қедимий вә бай тарихи, мәдәнийити тоғрилиқ йезилған әсәрләр мени бир өмүр өзигә мәһлия қиливалди. Бебаһа мирас қалдуруп кәткән иҗаткар хәлқимгә болған сөйгү-муһәббитим техиму улғайди. Шу әснада мениңда хәлқим үчүн бирәр изгү иш қилсам, мәдәнийитимиз тәрәққиятиға тамчидәк болсиму өз үлүшүмни қошсам, дегән хаһиш-истәк пәйда болди. Ахирида бай тарихимизни, мәдәнийитимизни, нәмунилиқ урпи-адәтлиримизни өзимизгила әмәс, өзгә милләтләргиму тәшвиқ-тәрғип қилип, тонуштуруш үчүн рус тилида йеңи журнал нәшир қилиш арзу-армини мени беарам қилди. Бу, әлвәттә, наһайити мәшәқәтлик иш. Һәр һалда, бу арман-мәхситимни миллий мәдәнийитимизниң җанкөйәри, көрнәклик тиҗарәтчи Сүрийәм һәдә Һезимоваға ейтип көрүшни тоғра көрдүм. У яқ мени тиңшап, әтраплиқ ойланғандин кейин, ой-мәхситимни қизғин қоллап-қувәтләп, һәммә җәһәттин ярдәмлишидиғанлиғини ейтти. Буниң үчүн сахавәтлик һәдимизгә сәмимий рәхмитимни ейтимән. Шуниңдин кейин издинип, тиришип, «Ирадиниң» дәсләпки саниниму нәширдин чиқардуқ. Келәчәктә журналимизни һәммә қизиқип оқуйдиған нәширгә айландурушни мәхсәт қилип, шу йөнилиштә иҗадий издинип, ишләватимиз. Әлвәттә, бу җәһәттин бизгә көпчиликниң сәмимий мәслиһити, пикир-инкаслири, ярдими лазим.

Мошу йәрдә мәзкүр журналниң баш муһәррири С.Мәшрәповниң өзи  тоғрилиқ икки еғиз гәп қилмақчимиз. Сүлһи Яркәнт шәһиридики Х.Һәмраев намидики уйғур оттура мәктивидә билим алған. У оқуватқан чеғидила һәртәрәплимә истедати билән пәриқләнди: әла оқуди, шеир, этюд, һекайиләрни йезип, әдәбият өмигиниң ишиға паал арилашти, җәмийәтлик ишлардиму алдинқи сәптин көрүнди. Оқуғучиларниң мәктәпләрара уюштурулидиған һәрхил мусабиқә-көрүклиридә, пән олимпиадилирида талай қетим ғалип чиқип, мәктивиниң шәнини қоғдиди. Мәктәпни тамамлиғандин кейин, Алмутида алий билим дәргаһида оқуп, бир чәттин бу йәрдики «Гиртваре» җавапкәрлиги чәкләнгән йолдашлиғида ишләп, қабилийитини техиму йетилдүрди, тәҗрибә топлиди. Кейинки вақитларда туғулған жутида һәрхил нәмунилик ишларниң тәшәббускари болуп келиватиду. Наһийәлик Уйғур этномәдәнийәт мәркизиниң ишиға йеқиндин арилишиватиду. У инглиз тилини мукәммәл өзләштүргән тәрҗиман. Сүлһи Қазақстан Уйғур яшлири бирлигиниң актив әзаси, келәчигидин чоң үмүт күттүрүватқан яшлиримизниң бири. Қисқиси, Сүлһиниң паалийити, хәлқимиз арисида уйғурчә оқуғанларниң келәчиги йоқ, дегән хата чүшәнчиниң әмәлиятқа уйғун әмәслигигә ярқин мисал болалайду.

Шу күни мәрасимда сәһнигә чиқип, тәбрик сөзлигүчиләр нурғун болди. Уларниң ейтқан тиләк, ой-пикирлирини җәмләп, шуни изһар қилишқа болидуки, һәммиси мәдәнийитимиз һаятидики бу чоң йеңилиқни хошал қарши елип, униң үмүтварлиққа бөләйдиған ғенимәтлик иш екәнлигини тилға алған һалда  келәчәктә «Ирадиниң» заман тәливигә җавап беридиған, хәлиқ аммиси сөйүп оқуйдиған, мәзмуни бай, бәдиийлиги жуқури журнал дәриҗисигә йетишигә тиләкдашлиқ билдүрди.

Мәрасим «Ирадә» нахша-уссул ансамблиниң концерти билән башлинип, сөзара дилраба нахша-сазлар яңрап, уссуллар намайиш қилинди.

Шу йәрдә журналдин икки данә сетивелип, өйгә кәлдимдә, хелә вақитқичә униң сәһипилирини варақлап, бәзи хәвәр-мақалиларни оқуп чиқтим. Журналниң сиртқи муқависила әмәс, ички безилиши, түрлүк-түмән саһалардин, вақиәләрдин қисқа хәвәр-мақалиларниң орун елиши кишини алаһидә қизиқтуриду. Йәкүнләп ейтқанда, журнал сиздә чоң қанаәт һасил қилиду. Мениңдин бу журнални сориғанлар көп болди. Демәк, йеңи нәширниң оқуғучилириниң көпийидиғанлиғи чоқум.

Абдукерим ТУДИЯРОВ.

http://uyguravazi.kz/?p=10305#more-10305

ИРАДА life - Первый Уйгурский Глянцевый Журнал, который отображает традиции и обычаи уйгурского народа, его богатую культуру и историю, а также интервью с известными личностями Казахстана и многое многое другое.По вопросам приобретения журнала обращаться по тел.ном.8 701 644 4437.

 
Интересный материал? Поделись с другими:

Добавить комментарий


Защитный код
Обновить