Open login
Главная Новости «Өмримиз «нәй-нәй» биләнла өтүватқини йоқ»
«Өмримиз «нәй-нәй» биләнла өтүватқини йоқ»
08.04.2019 01:37   

«Өмримиз «нәй-нәй» биләнла өтүватқини йоқ»

Бәхтишат СОПИЕВ,

«Уйғур авази» гезити, 3 апрель, 2019 жил

Алмутида вә Алмута вилайитидә һәрхил мәрасим, той-төкүнләрдә паалийәт елип бериватқан сәнъәткарларимизниң сепи күн санап көпийиватиду. Раст, уларниң арисида кәспийи бар, ишқивази бар дегәндәк. Риқабәтчилик бар йәрдә, илгириләш болиду, әмәсму. Илгири йеза бир равапчи билән бир дапчиға қарап олтиратти. Һазир нахшичи билән риясәтчи көп. Шәхсән маңа уларниң өмлүги, бир-бири билән тәҗрибә алмаштуруш хислити яқиду. Йезида яшайдиғини шәһәрликтин келип бир нәрсиләрни үгинип кетиду. Йәнә бир хошал қилидиғини, уларниң тәшәббускарлиғиға һәйран қалимән. Әву бир жили улар Алмутида яшлар мәшривини қуруп, шәһәр вә униң әтрапидики, вилайәттики яшларниң бешини қошти. Яшлар арисида миллий әнъәнилиримизни тәшвиқат қилиш бүгүнму давамлишиватиду. Шу мәшрәп әзалириниң сани бүгүн бәш йүздин ашти. Шундақла уларниң спортқа болған қизиқишиму үстүн. Җай-җайларда өзара футбол, волейбол бойичә турнирларни уюштурмақта. Миллий мәтбуатлиримиз муштирилириниң көпийишигиму ат селишиду.

Өткәндә «Шатлиқютуб» канилиниң мудири Шатлиқ Худайқуловниң рәһбәрлигидики бир топ яшлар «Уйғур авазиниң» кубоги үчүн мини-футболдин турнир уюштурсақ» дәп кәпту. Қарши болмидуқ.

 

Әйнә шу турнирға яш сәнъәткарлардин тәркип тапқан алтә вә ветеранлардин ибарәт бир команда иштрак қилди. Ветеранлар командисини яшлар «Юлтуз» дәп атапту. Мәйданғиму улар һөрмәт йүзисидин биринчиләрдин болуп чиқти. «Юлтузлардин» Сәйпидин Тайиров билән Сәһәрдин Йүсүповниң йешиниң әлликтин ашқанлиғиға һечким ишәнмиди. Чүнки улар яшлардин қелишмай ойниди. Амма үчинчи орун үчүн болған оюнда һерип қалди. Шуниңға қаримай, бири турнирниң «Әң яхши һуҗумчиси», йәнә бири «Әң яхши қоғдиғучиси» аталди. Шундақ қилип, үчинчи орунни «Орхон» командиси егилиди. Финалға чиққан чонжилиқлар билән яшларниң оюни наһайити қизиқ өтти. Һесапни “Яшлар” командиси әйип поңзәк арқилиқ ачқандин кейин чонҗилиқлар техиму паалийәтчанлиқ көрситип, ахири һесапни тәңләштүрди. Һәр иккила яқ күчлүк болғачқа, көпчилик пенальтини күтти. Амма яшларниң команда капитани, музыка пәниниң муәллими Дилшат Аликов кәсипдашлирини бу «мурәккәп вәзийәттин» елип чиқти. Һесап 2:1. «Чонҗа» иккинчи орунға еришти. «Яшлар» командисидин нахшичилар Аблеким Турсун, Расул Қурбанов, Алмас Мусалимов вә риясәтчи Үмүт Мәңсүровни тонудуқ.

 

Ғалип чиққан командиға «Уйғур авазиниң» кубогини гезитниң баш муһәррири Ершат Әсмәтов тапшурди. Баш муһәррир «Яшлар жилини» яхшилиқлар билән башлиған сәнъәткарларға иҗадий утуқ тиләп, уларни яшлар арисида миллий мәтбуатимизниң карван беши болған «Уйғур авази» гезитиға турақлиқ муштири болушқа һәм уни тәшвиқат қилишқа чақирди. Җумһурийәтлик Уйғур этномәдәнийәт мәркизи йенидики Спорт кеңишиниң рәиси Әкрәм Нурдинов, Талғир наһийәлик Уйғур этномәдәнийәт мәркизи йенидики Жигитбашлири кеңишиниң рәиси Октябрь Қурбанниязов, мәшиқләндүргүчи Әркинҗан Шаев вә башқилар сөзгә чиқип, көпқирлиқ яшлиримизниң келәчигигә утуқ тилиди.

Мәзкүр турнирға иштрак қилған һәрбир команда мәлум дәриҗидә бәдәл жиғипту. Йеңивалған команда чүшкән мәбләққә шәһәрдә туридиған бир нака балиға накалар һарвусини елип бәрди.

– Бизниң мәхситимиз «ундақ қилдуқ», «мундақ қилдуқ» дәп махтиниш әмәс, бәлки биримизниң бешиға күн чүшкәндә ярдәм қилиш, – дәйду Шатлиқ Худайқулов. – Сәнъәткарлар пәқәт елишнила әмәс, беришниму билиду. Вақтимизни тепип хәйрихаһлиққиму көңүл бөлүватимиз. Бәзибир чолта пикирлик адәмләргә ейтарим, бизниңму миллий ғуруримиз бар. Бизниң өмримиз пәқәт «нәй-нәй» биләнла өтүватқини йоқ.

http://uyguravazi.kazgazeta.kz/?p=38720

 
Интересный материал? Поделись с другими: