| Һезбуллам Ғенияровни яд әйлиди | |
|
Һезбуллам Ғенияровни яд әйлиди«Уйғур авази» гезити, 19 март 2019 жил
Йеқинда Әмгәкчиқазақ наһийәсиниң Маливай оттура мәктивидә шаир Һезбуллам Ғенияровниң туғулғиниға 80 жил толуши мунасивити билән әдәбий кәч болуп өтти. Униңға шаирниң синипдашлири, жутидики әл-ағинилири вә аилиси қатнишип, оқуғучилар тәрипидин тәйярланған әдәбий монтажни тамашә қилди. Әдәбиятниң поэзия жанрида өзигә хас из қалдуруп кәткән Һезбуллам Ғенияровқа һаят вақтида көрситишкә үлгирилмәй қалған һөрмәт, рәғбәтләндүрүшниң орнини толтурушниң бирла амили: шаирниң мәнивий ғәзниси – шеирлирини йоруққа чиқириш, уни шагиртларға оқуп, үгитиштин ибарәт. Шүкри, һазир шаирниң шеирлири ядқа елиниватиду. Йеқинда бир түркүм шеирлири «Ғунчә» журналида язғучи һәм журналист Авут Мәсимов тәрипидин рәтлинип, йоруқ көрди. Мошу изгү ишларниң һәммиси шаирниң дост-бурадәрлири, тонуш-билишлири тәрипидин әмәлгә ешиватиду.
Кәч җәриянида шаир тоғрилиқ иллиқ инкасларни билдүргән Маливай йеза округи һакиминиң орунбасари Мықтыбек Шыныбеков, ақсақаллар кеңишиниң әзалири Жансерик Аянбеков, Иминҗан Юнусов, йеқин дости Диас Курбанов, синипдашлири мәзкүр кәчни уюштурған мәктәп мәмурийитигә, уйғур тили вә әдәбияти пәнлириниң муәллимлиригә миннәтдарлиғини изһар қилди.
Шуниңдин кейин сөз новитини алған Һезбуллам Ғенияровниң чоң қизи, талантлиқ сәнъәткар Сумбат Ғениярова атисиниң шеирлириниң унтулмай, оқуғучилар тәрипидин бабиға йәткүзүп ядқа ейтиливатқанлиғиға рәхмитини ейтип, атиси тоғрилиқ әслимилири билән бөлүшти. Шуниңдин кейин шаирниң рәпиқиси Ризвангүл Ғениярова сөз елип, йолдишидин кейин бәш пәрзәндини «тумшуқлуққа чоқтурмай, қанатлиққа қақтурмай» тәрбийиләп өстүргинини вә уларниң қол йәткүзгән утуқлирини пәхирлиниш илкидә атап өтти. Ахирида Ғенияровлар аилиси тәрипидин дәстихан йейилип, мәрһумниң роһиға атап қуран тилавәт қилинди. Бүвинур ҮСӘНОВА, Маливай оттура мәктивиниң уйғур тили вә әдәбияти пәнлириниң муәллими. Әмгәкчиқазақ наһийәси. |
